Лонданскія паліцэйскія вынеслі заснавальніка «WikiLeaks» з амбасады Эквадору – і арыштавалі

ВІДЭА

Эквадор адмовіўся даваць прытулак Джуліяну Асанжу ў сваёй амбасадзе, дзе ён жыў апошнія сем гадоў.

Паводле лонданскай паліцыі, Асанж знаходзіцца пад вартай у паліцэйскім участку ў цэнтры Лондану. Агенцтва «Reuters» паведаміла, што ён арыштаваны па запыце ЗША.

Прэзідэнт Эквадору Ленін Марэна апублікаваў відэазварот у сваім «Twitter’ы», у якім заявіў, што адклікаў прытулак Асанжу праз неаднаразовыя парушэнні заснавальнікам «WikiLeaks» міжнародных канвенцый.

«WikiLeaks» таксама абвінаваціў Эквадор «у парушэнні міжнароднага права».

У афіцыйным «Twitterʼы» некамерцыйнай арганізацыі паведамляецца, што Асанжа могуць экстрадаваць у ЗША, дзе яму можа пагражаць нават смяротнае пакаранне за публікацыю сакрэтных дакументаў Пентагону. МЗС Вялікай Брытані сцвярджае, што заснавальніка «WikiLeaks» не экстрадуюць у ЗША.

Пра спыненне дзеяння прытулку «WikiLeaks» паведаміў 4 красавіка

Магчымай прычынай адмовы ў прытулку можа быць публікацыя пакету дакументаў «INA Papers».

У гэтых дакументах прасочваюцца аперацыі кампаніі INA Investment – афшора, які нібыта стварыў брат прэзідэнта Эквадору Эдвін Марэна.

Змова Асанжа і Мадуры?

У сакавіку міністр у справах камунікацыяў Эквадору Адрэс Мічэлена заявіў «CNN Espanol», што публікацыя з’яўляецца часткай змовы, якую Асанж, прэзідэнт Венесуэлы Мадура і экс-прэзідэнт Эквадору Рафаэль Карэа спланавалі, каб зрынуць урад Марэны. Адвакат Асанжа ў Эквадоры зняпраўдзіў датычнасць свайго кліента да публікацыі гэтых дакументаў.

Першае затрыманне і справа аб згвалтаванні

7 снежня 2010 года Асанжа затрымала лонданская паліцыя. Тады ён добраахвотна прыйшоў у паліцэйскі ўчастак, а праз дзевяць дзён Высокі суд у Лондане выпусціў заснавальніка «WikiLeaks» з турмы пад заклад.

У 2012 годзе брытанскі суд распарадзіўся аб арышце Асанжа па справе аб выдачы яго шведскім уладам. Пасля гэтага Асанж схаваўся ў амбасадзе Эквадора ў Лондане.

У 2017 годзе шведская пракуратура закрыла крымінальную справу аб згвалтаванні, распачатую ў дачыненні да заснавальніка сайту «WikiLeaks». Асанж назваў справу палітычнай. Ён сцвярджаў, што ў выпадку экстрадыцыі ў Швецыю яго выдадуць уладам ЗША.

Памёр хакер, які выдаў уладам ЗША інфарматара «Wikileaks»

Шведскія пракуроры хацелі дапытаць Асанжа па справе аб згвалтаванні, якое нібыта мела месца ў сярэдзіне 2010 года, і сексуальных дамаганнях да двух жанчын-валанцёраў «WikiLeaks».

«Wikileaks» прадаў беларускую апазіцыю? Медыякансультант пра тое, як гэта магло здарыцца

Некамерцыйная арганізацыя «Wikileaks» публікуе сакрэтную інфармацыю з ананімных крыніцаў.

ЮВ belsat.eu

Глядзі таксама
Каментары