У Берасці затрымалі блогера і прэс-сакратара ініцыятыўнай групы Святланы Ціханоўскай Аляксандра Кабанава
Паводле сведак на блогера зладзілі сапраўднае паляванне.
Сёння 15 чэрвеня а 19:28 стала вядома аб затрыманні блогера і прэс-сакратара ініцыятыўнай групы Святланы Ціханоўскай Аляксандра Кабанава. Аб гэтым «Белсату» паведаміў кіроўца Кабанава, які мае на імя Алег.
Алег паведаміў «Белсату», што Кабанаву патэлефанавалі з паліклінікі [у блогера раней быў дыягнаставаны каронавірус – belsat.eu] і запрасілі на нейкія працэдуры.
«Аляксандр падазраваў, што гэта можа быць правакацыя, бо тэст ужо быў адмоўны. Таму я паехаў разам з ім, прасачыў, каб ён бяспечна патрапіў у паліклініку. Там ён адмовіўся ад працэдур, і мы пайшлі ў краму, купіць паесці», – кажа мужчына.
Калі яны падыходзілі да крамы, Алегу патэлефанавалі з ДАІ. Маўляў, патрапіў у ДТЗ і схаваўся з месца злачынства. Пакуль ён разбіраўся з ДАІ, на Аляксандра зладзілі сапраўднае паляванне і ў выніку затрымалі.
«Асаблівы цынізм у тым, што Саша 2 месяцы быў на самаізаляцыі. Ён з хаты не выходзіў, не мог анічога здзейсніць», – наракае Алег.
Зараз Кабанаў знаходзіцца ў берасцейскім ІЧУ. Прычыны затрымання невядомыя. Берасцейскія актывісты шукаюць адваката і арганізоўваць перадачы.
«Будзем спрабаваць выцягваць яго законнымі метадамі», – гаворыць Алег.
- Гэтая прэзідэнцкая кампанія вылучаецца сваёй надмернай жорсткасцю ўжо на першых этапах. 29 траўня ў Горадні быў затрыманы Сяргей Ціханоўскі і яшчэ 8 ягоных паплечнікаў. Усе яны прызнаныя палітвязнямі.
- Пазней, 11 чэрвеня, пачаліся ператрусы і арышты сярод кіраўніцтва «Белгазпрамбанку», якім 20 гадоў кіраваў магчымы кандыдат у прэзідэнты Віктар Бабарыка.
КТ belsat.eu
