Дзеянні кіраўніцтва ЗША можна будзе лічыць паспяховымі, калі каронавірус заб’е менш за 200 000 чалавек, заявіў Дональд Трамп падчас прэс-канферэнцыі ў Белым доме.
«Падумайце пра гэтую лічбу: 2,2 млн чалавек маглі б загінуць, калі б мы нічога не рабілі», – сказаў прэзідэнт ЗША.
«Калі мы зможам знізіць гэты паказнік да, як мы казалі, 200 000 чалавек, то, хоць гэта і жудасная лічба, гэта значыць, што мы ўсе зрабілі вельмі добрую працу», – мяркуе Дональд Трамп.
Раней дырэктар Нацыянальнага інстытуту алергічных і інфекцыйных захворванняў ЗША Энтані Фаучы (Anthony Fauci) выказаў меркаванне, што ў краіне ахвярамі каронавіруса могуць стаць ад 100 000 да 200 000 асобаў. Паводле яго, каронавірусам заразяцца мільёны людзей.
Па стане на раніцу 30 сакавіка ў ЗША было больш за 142 тыс. інфікаваных. Каронавірус забіў там 2 502 асобы. Ахвярамі каронавіруса ў свеце ўжо сталі амаль 34 000 чалавек.
ЮВ belsat.eu