Стаў вядомы прысуд экс-намесніку міністра аховы здароўя Ігару Ласіцкаму


Ігар Ласіцкі, былы намеснік міністра аховы здароўя

Менскі гарадскі суд пакараў за карупцыйныя злачынствы былога намесніка міністра аховы здароўя Ігара Ласіцкага шасцю гадамі пазбаўлення волі, а былога галоўнага доктара 12-ай гарадской клінічнай стаматалагічнай паліклінікі Уладзіміра Краўчонка – пяццю.

Пра гэта паведамляе tut.by. Адбываць пакаранне Ласіцкі і Краўчонак будуць ва ўмовах калоніі ўзмоцненага рэжыму. Таксама прысуд прадугледжвае канфіскацыю маёмасці і пазбаўленне права займаць кіроўныя пасады цягам пяці гадоў.

Ласіцкага і Краўчонка прызналі вінаватымі паводле арт. 430 Крымінальнага кодэксу (атрыманне хабараў неаднаразова ў асабліва буйным памеры). У крымінальнай справе Ласіцкага і Краўчонка фігуруе шэраг карупцыйных эпізодаў, якія мелі месца з 2013 па 2018 год. Паводле следства, агулам галоўны лекар Краўчонак атрымаў «адкатаў» на суму каля $28 тыс. – нават больш чым намеснік міністра аховы здароўя. Ласіцкага вінавацяць у атрыманні хабараў толькі на суму $23,5 тыс.

Абодва прызналі сваю віну і раскаяліся. Ігар Ласіцкі знаходзіцца пад вартаю з 29 чэрвеня 2018 года. Уладзімір Краўчонак быў пад вартаю з 17 чэрвеня па 17 кастрычніка. Яму змянілі меру стрымання на хатні арышт і з лістапада 2018 года ён працаваў шараговым стаматолагам у 7-й паліклініцы. Адразу пасля сённяшняга прысуду на Краўчонка надзелі кайданкі.

Пракурор Юры Шарснёў прасіў суд пакараць Краўчонка пяццю гадамі пазбаўлення волі, а Ласіцкага – шасцю гадамі. Такім чынам, суд цалкам задаволіў просьбу дзяржабвінаваўца.

«Шкадую, што не здолеў устрымацца ад спакусы». Як медычныя функцыянеры бралі хабары на дзясяткі тысяч долараў

***

  • Суд над Ласіцкім і Краўчанкам – частка вялікай справы аб карупцыі пры закупах медычнага абсталявання і лекаў. У СМІ яе называюць «справай медычных функцыянераў» або «справай медыкаў». У межах справы вясной–летам 2018 года былі затрыманыя больш за 60 асобаў (у тым ліку 37 чыноўнікаў). Паводле КДБ, хабары даходзілі да $ 350 тыс. за адзін раз. Незаконна атрыманыя грошы пераводзіліся на рахункі фірмаў у Гон-Конгу, Літве, Латвіі, Расеі і ПАР. Праз карупцыю кошт і лекаў, і абсталявання завышаўся на 10-60 %, у асобных выпадках – на 100 %.
  • Акрамя Ласіцкага і Краўчанкі, сярод арыштаваных – дырэктар РНПЦ траўматалогіі і артапедыі Аляксандр Бялецкі, дырэктар Цэнтру экспертыз і выпрабаванняў у ахове здароўя Аляксандр Сталяроў, дырэктар прадпрыемства «Белмедтэхніка» Аляксандр Шарак, начальнік галоўнага ўпраўлення аховы здароўя Гарадзенскага аблвыканкаму Андрэй Стрыжак і начальнік вайскова-медычнага ўпраўлення Міністэрства абароны Аляксей Яськоў. Падчас ператрусу ў гаражы Шарака ў тайніку было выяўлена больш за $ 620 тыс. у эквіваленце, у Бялецкага – каля $ 500 тыс.
  • Ігар Ласіцкі стаў намеснікам міністра ў сакавіку 2013 года, лічыўся пратэжэ экс-міністра Васіля Жарка. Ласіцкі ажыццяўляў агульнае кіраўніцтва і кантроль за будаўніцтвам, рэканструкцыяй і развіццём матэрыяльна-тэхнічнай базы галіны аховы здароўя. Курыраваў пытанні абароту медычных вырабаў у Беларусі і ліцэнзавання, з’яўляўся старшынём профільных камісіяў Міністэрства аховы здароўя і «Белмедтэхнікі». Летась у ліпені Ласіцкага затрымаў КДБ.

ІІ, belsat.eu

Глядзі таксама
Каментары