Найбуйнейшае ў свеце судна «Pioneering Spirit», якое пракладвае трубы, распачало ўкладку газаправоду «Паўночная плынь – 2» у эканамічнай зоне Фінляндыі, паведамляе праектная кампанія «Nord Stream 2 AG».
«Pioneering Spirit» працягне ўкладку газаправоду ўслед за суднам «Solitaire», якое працуе ў Фінляндыі з верасня. «Solitaire» будзе працаваць у паўднёвай частцы выключнай эканамічнай зоны Швецыі, дзе цягам бліжэйшых месяцаў паўстане 510-кіламетровы ўчастак газаправоду.
Ужо змантавана каля 370 км «Паўночнай плыні – 2».
Кампанія «Nord Stream 2» атрымала неабходныя дазволы на будаўніцтва газаправоду ў чатырох з пяці краінаў, піша interfax.ru.
Сёлета вядомая расейская журналістка і публіцыст Юлія Латыніна напісала артыкул для «Новой газеты», у якім выказала меркаванне, што «Паўночную плынь – 2» Крэмль можа выкарыстаць дзеля анексіі Беларусі.
ЮВ, belsat.eu, паводле interfax.ru
