Юлія Латыніна: Расея можа выкарыстаць «Паўночную плынь-2» як дубінку для далучэння Беларусі


Вядомая расейская журналістка і публіцыст Юлія Латыніна лічыць, што праект «Паўночная плынь-2» Крэмль можа выкарыстаць дзеля анексіі Беларусі. Гэтую думку яна выказала ў сваім артыкуле для «Новой газеты».

Як піша Латыніна, большасць экспертаў лічаць, што праект трубаправода «Паўночная плынь-2» не акупіцца з фінансавага пункту гледжання. Таму рэалізоўваюць яго нібыта дзеля таго, каб пакараць украінцаў пазбаўленнем транзіту і даць магчымасць нажыцца падрадчыкаў, якія яго будуюць.

Латыніна ў сваю чаргу лічыць, што галоўная мэта Масквы – геапалітычная

«Гэтая мэта складаецца ў тым, каб прывязаць да сябе Германію. У выпадку будаўніцтва «Паўночнай плыні-2» Германія становіцца галоўным размеркавальнікам расейскага газу ў Еўропе. А расейскі газ, асабліва па знясіленні радовішчаў Паўночнага мора, сапраўды застаецца калі не адзінай, то безальтэрнатыўнай крыніцай. У тым сэнсе, што калі расейскі газ сыдзе з рынку, то замяніць яго будзе дорага і цяжка», – піша яна.

На думку Латыніна, тым самым «Паўночная плынь-2» гарантуе, што «Нямеччына будзе вымушана працягваць лічыцца з Расеяй, што б Крэмль ні выкінуў».

«А выкінуць Крэмль можа роўна дзве рэчы. Па-першае, зноў пачаць чарговы раўнд гібрыднай вайны на Украіне, спадзеючыся на ласку з боку Германіі. І па-другое, паспрабаваць яшчэ што-небудзь анексаваць – ды хоць Беларусь. Эканоміка Расеі знаходзіцца ў вольным падзенні. Рэйтынг прэзідэнта падае; анексія Крыму спрыяла падняццю гэтага рэйтынгу. У такой сітуацыі наступны «крымнаш» – гэта проста пытанне часу. Дарэчы, пра Беларусь, напрыклад. За Грузіяй і Украінай усё забыліся пра яе, а між тым яна: а) уяўляе сабой цалкам спакусліва кавалак; б) дазваляе вырашыць вядомую праблему 2024 года. У гэты год сканчаецца чарговы прэзідэнцкі тэрмін, і, каб яго падоўжыць, трэба мяняць Канстытуцыю. А ў выпадку аб’яднання Расеі і Беларусі Канстытуцыю прыйдзецца мяняць само сабой. Дзяржава ж зменіцца – і Канстытуцыя таксама», – адзначае Латыніна.

Журналістка таксама нагадвае, што прапускная здольнасць «Паўночнай плыні-2» – 55 млрд кубаметраў у год – прыкладна адпавядае прапускной здольнасці беларускай трубы.

«Цяпер «Газпрам» перакрыць гэтую трубу не можа: гэта выкліча зрыў паставак газу ў Еўропу і зразумелы скандал. Але перакрыць яе пасля будаўніцтва «Паўночнага патоку-2» будзе нескладана. Пры гэтым беларускія газавыя сеткі маюць адно фундаментальнае і патэнцыйна фатальнае адрозненне ад украінскіх: а менавіта яны ўсё – і магістральныя, і размеркавальныя – на 100% належаць «Газпраму». Так што рэверс будзе арганізаваць немагчыма», – падкрэслівае яна.

Таму, робіць выснову Латыніна, Масква можа выкарыстаць «Паўночны струмень-2» як «магчымую дубінку для далучэння Беларусі».

«Паўночная плынь – 2» (анг. «Nord Stream 2») – праект магістральнага газаправоду з Расеі ў Германію праз Балтыйскае мора. Праект мусіць быць завершаны ў наступным годзе.

ІІ, belsat.eu, паводле Новая газета

Стужка навінаў