Палітвязень Віталь Шкляраў адпушчаны з СІЗА пад асабістае паручальніцтва Юрыя Васкрасенскага. Пра гэта «Новой газете» паведаміў сам Васкрасенскі, інфармацыю пацвердзіў і адвакат Шклярава Антон Гашынскі. Віталю Шкляраву змянілі меру стрымання на хатні арышт.
Гэта ўжо шосты палітвязень, якому змянілі меру cтрымання пасля візіту Лукашэнкі ў СІЗА КДБ.
Віталю Шкляраву змянілі меру стрымання на хатні арышт. «Я яшчэ не бачыў пастановы на змену меры стрымання. Але ў Следчы камітэце мне пацвердзілі, што на сённяшні дзень яму мера стрымання змененая на хатні арышт», – паведаміў belsat.eu адвакат палітвязня Антон Гашынскі.
Пакуль невядома, дзе мусіць знаходзіцца пад хатнім арыштам Віталь Шклярава – у Менску ці ў бацькоў у Гомлі.
Адвакат яшчэ не бачыў Віталя пасля таго, як было прынята рашэнне аб змене меры стрымання. Але сёння ў СК прызначаны следчыя дзеянні з удзелам Шклярава.
Паліттэхнолага Віталя Шклярава затрымалі ў Гомлі 29 ліпеня і вінавацілі паводле ч.1 артыкула 342 КК (арганізацыя і падрыхтоўка дзеянняў, што груба парушаюць грамадскі парадак).
Шкляраву прыпісвалі супрацу з Ціханоўскім, аднак і Ціханоўскі, і сам Шкляраў гэтую інфармацыю зняпраўджвалі.
Віталь Шкляраў нарадзіўся ў Гомлі. Вучыўся ў Нямеччыне, працаваў у выбарчых кампаніях Ангелы Мэркель, Барака Абамы, Бэрні Сандэрса. Жонка паліттэхнолага – грамадзянка ЗША, якая працуе ў амерыканскай амбасадзе ў Кіеве. Таму ў Шклярава ёсць дыппашпарт.
- 10 кастрычніка ў СІЗА Камітэту дзяржаўнай бяспекі Аляксандр Лукашэнка сустрэўся з арыштаванымі прадстаўнікамі Каардынацыйнай рады апазіцыі і аб’яднанага штаба апазіцыі. Сустрэча працягвалася амаль пяць гадзін.
- 11 кастрычніка з СІЗА КДБ пад хатні арышт адпусцілі сябра ініцыятыўнай групы па зборы подпісаў Юрыя Васкрасенскага і дырэктара PandaDoc Дзмітрыя Рабцэвіча. Меру стрымання ім змянілі пасля сустрэчы з Аляксандрам Лукашэнкам.
- 13 кастрычніка пад падпіску аб нявыездзе вызвалілі яшчэ двух фігурантаў справы PandaDoc – галоўнага бухгалтара Юлію Шардыко і HR Уладзіслава Міхалапа.
- 17 кастрычніка стала вядома пра змену меры стрымання адвакату Іллі Салею, сам ён пакуль не камунікаваў з журналістамі.
АА belsat.eu
