Крымскія тэлеграм-каналы паведамляюць, што расейская супрацьпаветраная абарона (СПА) вядзе агонь па беспілотніках у небе над Севастопалем.
У мясцовых каналах з’явіліся відэа начной страляніны. Паведамляецца, што з расейскага боку, імаверна, працуюць ЗРК «Панцыр-С».
Кіраўнік расейскай адміністрацыі Севастопалю Міхаіл Разважаеў прызнаў, што ў горадзе зноў працуе СПА і заклікаў мясцовых жыхароў захоўваць спакой.
Расейскі тэлаграм-канал «Раньше всех. Ну почти» паведамляе, што СПА цяпер працуе не толькі ў Севастопалі, але і па ўсім Крыме.
Таксама ў сеціве зʼявілася відэа з трасы «Таўрыда»: на выездзе з Севастопалю пастаўлены КПП, дзе даглядаюць аўтамабілі, што пакідаюць горад. Імаверна, такім чынам шукаюць украінскіх дыверсантаў.
Раней увечары сведкі паведамілі аб працы СПА над Аленеўкай – яшчэ адным населеным пунктам у Крыме.
Нагадаем, у жніўні Крым пераўтварыўся ў адну з галоўных мішэняў ЗСУ: за апошнія 11 дзён па вайсковых аб’ектах расейскай арміі на паўвыспе была нанесеная серыя ўдараў.
Глеб Нержын belsat.eu
