Менская падатковая інспекцыя распарадзілася, каб установы грамадскага харчавання, у якіх будуць праходзіць навагоднія банкеты, паведамлялі ім падрабязную інфармацыю аб заказчыках святкаванняў. Ліст пра гэта быў разасланы ў такія ўстановы, піша «Зеркало».
Падатковая інспекцыя Менску разаслала ліст арганізацыям грамадскага харчавання, у якім просіць да 18 снежня даць ім інфармацыю аб банкетах, якія пройдуць з 15 да 31 снежня. Маленькія вечарынкі падаткавікоў не цікавяць, ім хочацца ведаць пра банкеты, на якія прыйдуць больш за 15 чалавек. Пры гэтым заказчыкам банкету можа быць не толькі фірма, але і фізічная асоба.
У лісце падатковай указана, што звесткі аб заказчыках вечарынак павінны змяшчаць такія дадзеныя:
- хто заказчык: найменне юрыдычнай асобы або фамілія, імя і імя па бацьку фізічнай асобы;
- кантактныя дадзеныя заказчыка;
- дата правядзення банкету;
- колькасць удзельнікаў;
- сума замовы;
- форма аплаты (наяўныя/безнаяўныя).
Падаткавікі спасылаюцца на Падатковы кодэкс (падпункт 1.12 пункта 1 артыкула 107), па якім яны маюць права атрымліваць ад арганізацый неабходныя дакументы, інфармацыю, звесткі, якія складаюць камерцыйную (прафесійную, банкаўскую, іншую ахоўную законам) таямніцу.
СП, belsat.eu
