У Магілёўскай вобласці заўважылі чарговы грузавы цягнік з вайсковай тэхнікай, якія накіраваўся ў Расею. 14 кастрычніка эшалон быў у Воршы, піша Telegram-канал «Беларускі гаюн».
Не менш за 22 адзінкі танкаў Т-72А рэжым Лукашэнкі перадаў Расеі. Грузавы эшалон заўважылі ў Воршы, адкуль ён накіраваўся ў РФ. Выказваецца меркаванне, што тэхніка, верагодна, была знята з захоўвання з 969-й базы рэзерву танкаў (Урэчча, Менская вобласць) і рухалася па чыгунцы Асіповічы-Магілёў-Ворша-РФ.
Існуе верагоднасць, што колькасць танкаў, якія вывезлі ў Расею 14 кастрычніка можа быць большай, чым два дзясяткі. Агулам за апошні тыдзень Расея атрымала з боку Лукашэнкі не менш за 67 танкаў Т-72А і не менш за 28 грузавікоў «Урал».
Суполка «Live. Сообщество железнодорожников Беларуси» раней паведамляла, што ноччу 11 кастрычніка са станцыі Бронная Гара (Берасцейскае аддзяленне Беларускай чыгункі) адправіўся грузавы цягнік з 26 вагонамі, загружанымі боепрыпасамі з 46-га арсеналу ракетаў і боепрыпасаў. Канчатковая кропка прызначэння ў гэтай групы вагонаў – станцыя Альхаватка ў Расеі непадалёк мяжы з Украінай. Грузаатрымальнік – упраўленне фінансавага забеспячэння Міністэрства абароны Расеі.
Таксама чыгуначнікі заўважылі, што яшчэ 30 верасня са станцыі Готня выправілі 72 вагоны на станцыю Урэчча дзеля пагрузкі ваеннай тэхнікі. Састаў з тэхнікаў накіравалі ў Бранск, а адтуль у Готню.
З 1 да 9 кастрычніка на станцыі Урэчча вайскоўцы адгрузілі 20 баявых танкаў Т-72А. Бронемашыны адправілі ў накірунку Данецку.
Алена Аляксандрава belsat.eu