Кіраўніца фонду «Вольная Бурація» пра Дзень Расеі: «Людзі не разумеюць, што гэта свята»
У РФ 12 чэрвеня адзначаюць Дзень Расеі, але яе грамадзяне нават не разумеюць сэнсу свята. Пра гэта ў эфіры «Студыі «Белсат» раніцай 12 чэрвеня заявіла кіраўніца фонду «Вольная Бурація» Аляксандра Гармажапава.
«Шмат хто ў Расеі нават не разумее, што гэта за дзень. Спрабуюць гугліць, глядзець, чым ён адрозніваецца ад 4 лістапада або Дня Канстытуцыі ці яшчэ ад нейкіх шматлікіх святаў, якія Крэмль так старанна штампуе, але ніяк не можа патлумачыць, што яны азначаюць», – заявіла грамадская дзяячка.
Агулам жа, паводле яе, сэнс свята ў незалежнасці ад СССР сёння «гучыць як абсурд, бо Расея працягвае палітыку Савецкага Саюзу».
На думку Гармажапавай, сучасная гісторыя пачалася «няправільна», бо не было сумленнай размовы паміж катамі ды іхнымі ахвярамі, паміж рознымі прадстаўнікамі народаў, якіх у Расеі больш як 190.
«Усе зрабілі выгляд, што ўсё нармальна. Замялі смецце пад лавачку, а цяпер раптам адкрылася фортка, дунуў вецер і ўсё гэтае смецце разляцелася па ўсёй кватэры», – заявіла актывістка.
Яна адзначыла, што ў СССР у гарадах Бураціі зусім не вывучалі бурацкай мовы, зневажалі карэнных жыхароў, «але гэтага ніхто не абмяркоўваў, усе пайшлі далей».
Вынікам, на думку кіраўніцы «Вольнай Бураціі», стала сённяшняя сітуацыя з непавагай да іншых моваў, культураў – у прыватнасці ўкраінскай, што спрычынілася да поўнамаштабнай вайны.
Якуб Хруст belsat.eu
