Як паведамляюць праваабаронцы, 7 жніўня былая актывістка Партыі БНФ Людміла Рамановіч выйшла на волю, цалкам адбыўшы свой тэрмін.
Людміла Рамановіч была затрыманая пасля таго, як напісала ліст да адміністрацыі Лукашэнкі з асуджэннем саўдзелу ў вайне супраць Украіны. Потым супраць жанчыны завялі крымінальную справу за іншы зварот, у Следчы камітэт. Там жанчына ўжыла слова «ўзурпатар» – гэта палічылі публічнай абразай Лукашэнкі (арт. 368 Крымінальнага кодэкса). У выніку 20 чэрвеня 2022 года суд Маларыцкага раёну прызначыў Людміле Рамановіч 1,5 года пазбаўлення волі.
Тэрмін палітзняволеная адбывала ў гомельскай калоніі № 4. Там жа яна сустрэла сваё 58-годдзе.
Па стане на 8 жніўня 2023 года ў Беларусі ў зняволенні знаходзяцца 1485 асобаў, якіх праваабарончая супольнасць прызнала палітычнымі вязнямі.
Глеб Нержын belsat.eu
