Рада Еўразвязу 8 красавіка пастанавіла ўвесці пяты пакет эканамічных ды індывідуальных санкцыяў супраць Расеі. Новыя захады закліканыя ўзмацніць ціск на расейскія ўрад і эканоміку, а таксама абмежаваць рэсурсы Крамля для агрэсіі.
Сярод іншага, згодна з новым пакетам санкцыяў, забароняць перавоз па тэрыторыі ЕЗ аўтатранспартавым аператарам РФ і Беларусі. Выключэнні робяцца для перавозу харчоў, медычных і фармацэўтычных тавараў.
Таксама будуць забароненыя дэпазіты, крыптагаманцы, продаж банкнотаў і каштоўных папераў у любой з валютаў дзяржаваў – чальцоў ЕЗ у Расею і Беларусь, у тым ліку любой фізічнай ці юрыдычнай асобе, арганізацыі ці органу ў Расеі і Беларусі.
«Гэтыя апошнія санкцыі былі прынятыя пасля зверстваў, здзейсненых расейскімі ўзброенымі сіламі ў Бучы ды іншых месцах пад расейскай акупацыяй. Мэта нашых санкцыяў – спыніць безразважныя, бесчалавечныя ды агрэсіўныя паводзіны расейскіх войскаў і даць зразумець асобам, якія прымаюць рашэнні ў Крамлі, што іхная незаконная агрэсія дорага абыходзіцца», – зазначыў Жузэп Бурэль, вярхоўны прадстаўнік Рады ў замежных справах і палітыцы бяспекі ЕЗ.
ГГ, belsat.eu
