Святлана Ціханоўская пастанавіла звольніць Аляксандра Азарава з пасады прадстаўніка ў аднаўленні законнасці і правапарадку. Ён пракаментаваў «Белсату» гэтае рашэнне.
Аляксандр Азараў сказаў, што для яго фактычна нічога не змянілася:
«Я збіраюся далей працаваць. Я кіраўнік «ByPol», план «Перамога» застаўся ў нас. Я буду каардынатарам гэтага плану і падпольнага руху Беларусі пры Кабінеце. Фактычна ў маёй працы нічога не мяняецца».
У каментары «Белсату» ён адзначыў, што, хаця і звальненне і крыўднае, пасада – не галоўнае для яго:
«Я гэта прымаю. У нас дэмакратыя. Каардынацыйная рада пастанавіла, Святлана Ціханоўская падтрымала гэтае рашэнне. Я сюды прыехаў не дзеля пасадаў, а дзеля барацьбы з рэжымам Лукашэнкі».
Згодна з рашэннем Ціханоўскай, Азараў працягне супрацу з Кабінетам у пытаннях, звязаных з планам «Перамога» і падполлем у Беларусі.
Пасада прадстаўніка ў аднаўленні законнасці і правапарадку застаецца вакантнаю, прэтэндэнтаў цяпер шукаюць.
Сёння раней стала вядома, што ў выніку слуханняў Каардынацыйная рада рэкамендавала звольніць Азарава.
Сяргей Крот belsat.eu