Польская пракуратура перадала ў суд у Беластоку справу супраць грамадзянаў Беларусі і РФ, якіх вінавацяць у шпіянажы на карысць расейскай вайсковай выведкі. Пра гэта паведамляе агенцтва PAP.
Пракуратура выставіла беларусу і расейцу абвінавачанне ў шпіянажы на карысць РФ у перыяд з 2017-га да красавіка 2022 года.
Следства лічыць, што яны бралі ўдзел у дзейнасці расейскай вайсковай выведкі і збіралі інфармацыю аб вайсковых абʼектах, якія маюць вызначальнае значэнне для абароны Польшчы. Актыўней за ўсё шпіёны дзейнічалі на паўночным усходзе Польшчы.
Абодва жылі ў краіне легальна. Грамадзянін Беларусі спачатку вучыўся ў адной з ВНУ Беластоку, а пасля ўладкаваўся на працу ў школу парашутнай падрыхтоўкі. Там ён займеў кантакты, якія выкарыстоўваў у шпіёнскіх мэтах. Грамадзянін РФ ажыццяўляў шпіянаж пад выглядам культурніцкай і турыстычнай дзейнасці, мяркуюць у пракуратуры.
Глеб Нержын belsat.eu