Літоўскі Цэнтр даследаванняў Усходняй Еўропы (RESC) агучыў вынікі даследавання пра беларусаў, якія з’ехалі ў Літву пасля 2020 года. Большасць грамадзянаў пакінула краіну з палітычных матываў.
Паводле справаздачы літоўскага Цэнтру даследаванняў Усходняй Еўропы, цяпер у Літве могуць быць каля 40 тысяч грамадзянаў Беларусі. Каля 86 % мігрантаў вымушаныя былі пакінуць Беларусь з палітычных матываў.
Амаль 70 % апытаных маюць у Літве сталую крыніцу прыбыткаў, гэта людзі працаздольнага веку. 68 % рэспандэнтаў маюць від на жыхарства ў Літве, 15 % зʼехалі паводле гуманітарнай візы, яшчэ 8 % атрымалі афіцыйны прытулак або чакаюць рашэння пра наданне прытулку.
Вайна ва Украіне прывяла да таго, што ў мігрантаў з Беларусі зʼявілася большае жаданне інтэгравацца ў Літве.
Пры гэтым пераезд беларусаў у Літву мае станоўчы эфект для бюджэту краіны. Паводле падлікаў «Invest in Lithuania», кампаніі, якія перавезлі сваіх працаўнікоў у 2021 годзе, заплацілі ў бюджэт больш за 20 мільёнаў еўраў падаткаў.
Больш спрыяльныя ўмовы для інтэграцыі грамадзянаў Украіны не выклікалі напружанасці паміж беларусамі і ўкраінцамі ў Літве, але гэта прывяло да недаверу беларускай дыяспары да літоўскіх інстытутаў.
Нават за мяжою беларусы адчуваюць сябе ўразлівымі праз тое, што ўлады Беларусі могуць выкарыстоўваць консульскія службы як сродак сачэння і ціску.
Тым не менш беларусы ў Літве пачуваюцца ў бяспецы.
Алена Аляксандрава belsat.eu