Міністэрства энергетыкі Казахстану атрымала запыт ад беларускага канцэрну «Белнафтахім» на пастаўку нафты. Пра гэта заявіў міністр энергетыкі Казахстану Нурлан Нагаеў, паведамляе Tengrinews.kz.
Просьба ад «Белнафтахіму» паступіла ў адрас Міністэрства энергетыкі Казахстана. Прадстаўнікі канцэрну плануюць 20 студзеня прыехаць у Казахстан для абмеркавання паставак.
«Мы на сёння ажыццяўляем пастаўкі нафты па дыверсіфікаваных напрамках, і мы разгледзім прапанову беларускага боку», – паведаміў міністр Нурлан Нагаеў.
Паводле яго, калі якая-небудзь з нафтавых кампаніяў пагодзіцца на пастаўкі, угода пры стане магчымай.
Раней прадстаўнік азербайджанскай дзяржаўнай нафтавай кампаніі SOCAR Ібрагім Ахмедаў заявіў, што Азербайджан тэхнічна можа паставіць як сваю нафту, так і нафту іншых краінаў Беларусі. Але, паводле яго, нічога канкрэтнага пакуль на гэты конт няма.
У сваю чаргу амбасадар Латвіі ў Беларусі Эйнарс Семаніс адзначыў, што падчас візіту ў Беларусь латвійскага прэм’ер-міністра Крыш’яніса Карыньша будзе абмяркоўвацца магчымасць паставак нафты ў Беларусь праз латвійскую тэрыторыю.
Таксама стала вядома, што нафтавыя кампаніі расейскага алігарха Міхаіла Гуцэрыева пачалі пастаўкі нафты ў Беларусь.
З 1 студзеня Расея спыніла падачу нафты для НПЗ Беларусі праз тое, што Масква і Менск не заключылі новыя кантракты. Беларускія НПЗ працягвалі працаваць, але загрузка вытворчых магутнасцяў зніжаная да тэхналагічнага мінімуму. У звязку з адсутнасцю паставак нафты з Расеі з 1 студзеня Беларусь часова прыпыніла экспарт нафтапрадуктаў.
Дамоўленасць на пастаўкі нафты на дзяржаўным узроўні дасягнуць так і не атрымалася.
МГ belsat.eu
