Без міліцыі бегаць нельга: новы закон заблакаваў правядзенне марафону на Смаргоншчыне
«Федэрацыя прыгодніцкіх гонак» запланавала на 14 красавіка правядзенне веламарафону «Вітаўт» і аматарскага забегу «Жук-трэйл» у ваколіцах Крэва, але спартовая падзея апынулася пад пагрозаю.
Relive ‘#витовтмарафон тест’
Мясцовыя ўлады пагадзіліся на правядзенне марафону і забегу ў выпадку падпісання дамовы з РАУС на «ахову грамадскага парадку падчас правядзення масавага мерапрыемства». Такую працэдуру прадугледжвае заканадаўства (Палажэнне аб аплаце паслугаў па ахове грамадскага парадку на масавых мерапрыемствах), якое распаўсюджваецца на ўсе масавыя падзеі, у тым ліку і спартовыя, калі яны праходзяць без удзелу органаў улады.
Паводле кіраўніка «Федэрацыі прыгодніцкіх гонак» Міхаіла Сідарука, «адзіны для нас варыянт – знайсці агульную мову з райвыканкамамі ды аблвыканкамамі і трапіць у іхны каляндар мерапрыемстваў».
Але зрабіць гэта можна толькі ў лістападзе-снежні, калі мясцовыя ўлады робяць план мерапрыемстваў на будучы год. Той, хто не паспеў гэта зрабіць, той спазніўся.
«Смаргонскі райвыканкам не знайшоў падставаў уключыць нас у свой каляндар і стаць суарганізатарам без прадстаўлення фінансавання», – распавёў Belsat.eu кіраўнік «Федэрацыя прыгодніцкіх гонак» Міхаіл Сідарук.
Арганізатары марафону і забегу былі гатовыя ўзяць на сябе кошт аплаты паслугаў медыкаў, а ў звароце да мясцовых уладаў зазначылі, што не прэтэндуюць на «выдзяленне фінансавання».
«Мы не прасілі цяпер і не просім ніколі якога-кольвек фінансавання забегаў і веламарафонаў. У нашай краіне шмат іншых спраў, дзе могуць спатрэбіцца бюджэтныя грошы», – дадаў Міхаіл Сідарук.
Кошт паслугаў міліцыі падчас марафону і забегу складае 225 базавых велічыняў (Br 5737,5).
У «Вітаўце» і «Жук-трэйле» плануюць узяць удзел каля 250 асобаў. На арганізацыю падзеі было сабрана Br 5692,8. З улікам паслугаў міліцыі кошт удзелу ў марафоне і забегу ўзрасце ў два разы.
«Крыўды няма. Толькі расчараванне і боль, што прыгожы івэнт, накіраваны на спорт, актыўны адпачынак, які паказвае прыгажосць нашых месцаў і гістарычных помнікаў, аказаўся нікому не патрэбны», – рэзюмаваў Сідарук.
У мінулым годзе ў ініцыятывах, арганізаваных «Федэрацыяй прыгодніцкіх гонак», міліцыянты не былі задзейнічаныя, а ўсе івэнты прайшлі без здарэнняў і нараканняў мясцовых уладаў.
1 красавіка Міністэрства спорту і турызму распачало прававы маніторынг пастановы ўраду, якая рэгулюе «некаторыя аспекты правядзенне спартовых мерапрыемстваў».
ЮВ belsat.eu
