Гэта яшчэ не рэкорд за ўвесь час, але тэндэнцыя насцярожвае: з Беларусі ў Літву ўсё больш масава ідуць грамадзяне трэціх краінаў.
За суботу 27 жніўня літоўскія памежнікі спынілі 125 чалавек, якія спрабавалі перайсці беларуска-літоўскую мяжу нелегальна, піша 15min.lt са спасылкаю на прэс-службу памежнікаў. 26 жніўня спынілі 122 чалавек, 25-га – 124. Пры тым у суседняй Латвіі за мінулы дзень не заўважылі ніводнай спробы нелегальна перайсці мяжу.
Такая колькасць спробаў нелегальнага пераходу далёка не рэкордная: 9 лістапада мінулага года спынілі аж 281 чалавека. Але для гэтага года гэта рэкорд. А рост колькасці спробаў нелегальнага пераходу фіксуюць з канца ліпеня.
Мігранты спрабуюць прайсці як там, дзе няма загародаў і сістэмаў абароны мяжы, так і там, дзе бар’ер ёсць. Паводле літоўскіх памежнікаў, беларускія службоўцы вучаць мігрантаў, як пераадолець бар’еры і якія месцы выбраць, а часам і самі рэжуць дрот, каб мігранты маглі прайсці.
Летась у Літву з Беларусі нелегальна трапілі каля 4,2 тысячы чалавек – збольшага грамадзяне краінаў Блізкага Усходу і Паўночнай Афрыкі. Са жніўня мінулага года літоўскім памежнікам дазволілі выправаджваць назад у Беларусь мігрантаў, якіх злавілі на нелегальным пераходзе. З таго часу мігрантаў «развярнулі» больш за 13 тысячаў разоў.
Польскія памежнікі расказваюць тое самае: беларускія памежнікі пілуюць балгаркамі дзіры ў плоце і прапускаюць мігрантаў. З пачатку года польскія памежнікі зарэгістравалі больш за 7 тысяч спробаў парушыць мяжу з боку Беларусі.
Алесь Наваборскі belsat.eu