Памежная ахова Польшчы паведаміла пра чарговы інцыдэнт з мігрантамі, якія незаконна спрабавалі перайсці мяжу з Беларуссю. Тым часам стала вядома, што да арганізацыі нелегальных плыняў могуць быць датычныя студэнты з Туркменістану.
25 верасня з Беларусі ў Польшчу спрабавалі незаконна заехаць 53 замежнікі, у тым ліку грамадзяне Іраку, Афганістану і Сірыі. Чатыры асобы, пабачыўшы патрулі, вярнуліся назад у Беларусь.
Паміж Белавежай і Нараўкай група агрэсіўных замежнікаў закідала патрулі камянямі.
Тым часам выданне Turkmen.news паведаміла, што туркменскія студэнты ў Беларусі аказаліся масава ўцягнутымі ў кантрабанду людзей. У выніку ў верасні ў беларускія ВНУ нават трапіў ліст з подпісам намесніка міністра адукацыі Беларусі Аляксандра Бахановіча з патрабаваннем сачыць за навучэнцамі з Туркменістану, не дапускаць пропускаў імі заняткаў і ўзмацніць прафілактычную працу.
Паводле крыніцы turkmen.news, туркменскія студэнты на машыне давозяць групы замежнікаў да мяжы з Польшчай, пераводзяць іх на польскі бок і саджаюць у машыну суўдзельнікаў. Потым яны фатаграфуюць сваіх падапечных як доказ выкананай працы, вяртаюцца ў Менск ці Берасце і атрымліваюць 3–4 тысячы долараў. Грошы за працу ім выплачвае этнічны курд.
У артыкуле таксама называюцца імёны трох студэнтаў з Туркменістану, якіх асудзілі на тэрміны ад 3 да 4,5 гадоў пазбаўлення волі за спрыянне нелегальнай эміграцыі. Яшчэ каля трох дзясяткаў пасля затрымання на мяжы аштрафавалі і дэпартавалі з Беларусі.
Раней польскі брыгадны генерал Аркад’юш Мікалайчык, камандуючы аператыўнай групай «Падляшша», заявіў, што ў беларускіх сілавікоў узніклі праблемы пасля ўзмацнення польскай прысутнасці на мяжы.
«Відаць, што яны цяпер пад вялікім ціскам, і немагчымасць пераправіць мігрантаў праз нашую мяжу азначае, што ў іх ёсць праблемы не толькі з кіраваннем гэтай аперацыяй, але і з кіраваннем людзьмі, якіх яны сабралі на сваім баку. Яны гоняць мігрантаў да самай мяжы ў прынцыпе на ўсёй яе працягласці», – заявіў Мікалайчык.
Якуб Хруст belsat.eu