У беларускіх сілавікоў узніклі праблемы пасля ўзмацнення польскай прысутнасці на мяжы. Пра гэта РАР распавёў камандуючы аператыўнай групай «Падляшша» брыгадны генерал Аркад’юш Мікалайчык.
Брыгадны генерал адзначыў, што польскія сілы канцэнтруюцца на ўдасканаленні сувязі і сістэмы кіравання на мяжы, павышаюць узровень манеўранасці.
«Мы лепш чытаем сітуацыю, хутчэй робім высновы і адэкватна рэагуем», – сказаў Аркад’юш Мікалайчык.
А вось з беларускага боку мяжы, паводле яго, праблемы выраслі.
«Мы бачым, што прадстаўнікі службаў у масках вядуць выведку са сваёй тэрыторыі. Яны за намі назіраюць», – адзначыў ён.
Таксама польскі вайсковец распавёў пра цяжкасці з перапраўкаю мігрантаў.
«Відаць, што яны цяпер пад вялікім ціскам, і немагчымасць пераправіць мігрантаў праз нашую мяжу азначае, што ў іх ёсць праблемы не толькі з кіраваннем гэтай аперацыяй, але і з кіраваннем людзьмі, якіх яны сабралі на сваім баку. Яны гоняць мігрантаў да самай мяжы ў прынцыпе на ўсёй яе працягласці», – заявіў Мікалайчык.
Што датычыць вагнэраўцаў, то, падкрэсліў ён, пагроза з іхнага боку захоўваецца, таму польскія службы павінны быць вельмі пільнымі і гатовымі да любых варыянтаў.
Польшча можа адкрыць памежныя пункты на мяжы з Беларуссю, але для гэтага трэба, каб рэжым Лукашэнкі пайшоў на саступкі і выканаў пэўныя ўмовы.
«Я спадзяюся, што [рэжым. – Заўв. belsat.eu] стане мякчэйшым у шмат якіх вымярэннях, не толькі ў міграцыйнай палітыцы, але і ў гульні цягліцамі. Не трэба, каб за нашай мяжой стаяла група злачынцаў, якую ўтрымлівае Лукашэнка, Група Вагнэра ці частка яе, гатовая на ўсё. Гэта людзі з баявым досведам, з досведам забойстваў. Мы чакаем, што Лукашэнка пазбавіцца ад гэтых людзей», – адзначыў намеснік міністра МУС Польшчы Мацей Вонсік.
Дзяржсакратар Савету Бяспекі Беларусі Аляксандр Вальфовіч папракнуў суседнія заходнія краіны тым, што яны вытурваюць на тэрыторыю Беларусі сотні мігрантаў, і апраўдаўся за побыт наймітаў ПВК Вагнэра ў нашай краіне. Ён таксама заявіў, што Беларусь «ніколі не ўяўляла пагрозы для суседзяў».
Якуб Хруст belsat.eu