Эстонія запэўніла Ціханоўскую, што дазволіць беларусам паступаць у эстонскія ўніверсітэты
Офіс Святланы Ціханоўскай апублікаваў ліст ад міністра замежных справаў Эстоніі Урмаса Рэйнсалу адносна адукацыі беларусаў у Эстоніі.
Міністр Урмас Рэйнсалу запэўнівае, што беларусаў не будуць абмяжоўваць у доступе да адукацыі ў Эстоніі: асацыяцыя «Універсітэты Эстоніі» паведаміла яму, што ўстановы адукацыі не ўводзяць ніякіх абмежаванняў акрамя прынятых Эстоніяй санкцыяў.
Цяперашнія эстонскія законы дазваляюць даваць грамадзянам Беларусі доўгатэрміновыя візы і дазволы на жыхарства для атрымання адукацыі ў Эстоніі. А значыць, беларусаў могуць прымаць на вучобу эстонскія ўніверсітэты.
«Я цалкам падзяляю вашую думку аб тым, што для дэмакратычнай будучыні Беларусі спатрэбяцца вальнадумныя, адукаваныя маладыя людзі і што наш абавязак – падтрымліваць памкненні моладзі», – напісаў Урмаса Рэйнсалу.
Найлепшым універсітэтам Эстоніі лічыцца Універсітэт Тарту. У камбінаваным рэйтынгу ARTU ён займае 302 месца ў свеце – нават вышэй за польскія Ягелонскі і Варшаўскі ўніверсітэты (343 і 364 месцы адпаведна). Беларускія ўніверсітэты ў гэты аб’яднаны рэйтынг не трапілі – аказаліся ніжэй за топ-400. Але, напрыклад, у рэйтынгу «QS World University Rankings 2023» Універсітэт Тарту крыху ніжэй за Варшаўскі і Ягелонскі – і нават ніжэй на 5 пазіцыяў за Беларускі дзяржаўны ўніверсітэт.
Алесь Наваборскі belsat.eu
