Салідарнасць з Украінай і эвакуацыя з прыфрантавых гарадоў. Фатаграфіі тыдня

Мітынг еднасці з Украінай адбыўся ў Вільні, у ім прынялі ўдзел каля 1000 чалавек. Пасля мітынгу на Катэдральнай плошчы адбылося шэсце да Лукішскай плошчы, дзе пачаўся канцэрт. Вільня, Літва. 24 лютага 2024 года.

Фермеры на трактарах прыбываюць да цэнтральнай плошчы ў Мадрыдзе падчас акцыі пратэсту з асуджэннем іх умоў працы і еўрапейскай сельскагаспадарчай палітыкі. Мадрыд, Іспанія. 21 лютага 2024 года.

Салдаты ганаровай варты нясуць дзяржаўны сцяг, знойдзены ў кішэні Андрэя Дыгдаловіча, які быў застрэлены снайперам на вуліцы Інстытуцкай у Кіеве 20 лютага 2014 года, падчас цырымоніі ўзняцця сцяга ля мемарыялу героям Нябеснай Сотні ў Львове, Украіна. 20 лютага 2024 года.

67-гадовая Таццяна збірае дровы для ацяплення свайго дому з-пад абломкаў абстралянага будынку ў вёсцы недалёка ад лініі фронту ў Аўдзееўцы, Украіна. 22 лютага 2024 года.

Караван вярблюдаў ідзе па заснежанай дарозе ля гораду Ван (Van), Турцыя. 21 лютага 2024 года.

Украінец Аляксандр чакае адпраўкі эвакуацыйнага цягніка са сваёй хатняй птушкай у Пакроўску. Мужчына быў вымушаны пакінуць свой дом у Сэлыдаве з-за ўзмацнення расейскіх ракетных удараў у раёне Аўдзееўкі. Пакроўск, Украіна. 20 лютага 2024 года.

Пацук, схапіўшы кавалачак хлеба, спрабуе ўцячы з атачэння галубоў у Парыжы, Францыя.

Турысты катаюцца на веласіпедзе на зіплайнах у цёплы зімовы дзень на гарналыжным курорце Hautacam у камуне Басэнс (Beaucens). Верхнія Пірэнэі, Францыя. 20 лютага 2024 года.

Перамешчаныя палестынскія дзеці атрымліваюць ежу ў дзяржаўнай школе ў Рафаху на поўдні сектару Газа. 19 лютага 2024 года.

Знясілены кашалот (лат. Physeter macrocephalus) прыплыў у Асакскі заліў гораду Сакаі, Японія. 19 лютага 2024 года.