Беларускі Чырвоны Крыж схлусіў, што больш не будзе засядаць у выбарчых камісіях – «БЮРО»
Беларускі Чырвоны Крыж парушыў абяцанне не ўдзельнічаць у выбарчых працэсах, паведамляе «БЮРО». У распараджэнні журналістаў аказаўся афіцыйны адказ Беларускага таварыства Чырвонага Крыжа пра тое, што арганізацыя пасля змены заканадаўства аб сваёй дзейнасці не будзе ўдзельнічаць у выбарах ні на якіх узроўнях. На практыцы гэта аказалася хлуснёй.
Новы закон «Аб Беларускім таварыстве Чырвонага Крыжа (БТЧК)» прыняты ў лістападзе 2020 года. Там і прапісаная забарона на ўдзел у выбарах. Старая рэдакцыя закону не ўводзіла такіх абмежаванняў, таму чальцы Беларускага Чырвонага Крыжа маглі ў тым ліку ўваходзіць у склад выбарчых камісіяў.
«Але ў новай рэдакцыі дадалі артыкул пра тое, што БТЧК абавязанае кіравацца не толькі законамі Беларусі, але і статутамі Міжнароднага руху Чырвонага Крыжа і Чырвонага Паўмесяца і Міжнароднай федэрацыі таварыстваў Чырвонага Крыжа і Чырвонага Паўмесяца, а таксама іншымі дакументамі, прынятымі ў межах Міжнароднага руху Чырвонага Крыжа і Чырвонага Паўмесяца.
І з моманту ўваходжання ў сілу новага закону БТЧК абавязваецца не ўдзельнічаць у выбарчых працэсах, бо гэта не супадае з асноўнымі прынцыпамі міжнароднага руху – нейтральнасцю і незалежнасцю», – падкрэслівае «БЮРО».
Адзіны дзень галасавання 25 лютага – першыя выбары пасля таго, як абнавілася заканадаўства, і адразу яно было парушанае. Журналісты знайшлі тры выбарчыя акругі, дзе ў склад выбарчых камісіяў уваходзяць працаўнікі БТЧК. Гэта:
Бабруйска-Першамайская выбарчая акруга № 79
Быхаўская выбарчая акруга № 81
Крычаўская выбарчая акруга № 83
Усе тры прадстаўнікі – з Магілёўскай абласной арганізацыі БТЧК. Іх імёны невядомыя, бо пасля выбараў 2020 года склады камісіяў засакрэчаныя.
Такім чынам, БТЧК чарговым разам парушыла прынцыпы Міжнароднага руху Чырвонага Крыжа і Чырвонага Паўмесяца, а таксама закон.
Арсен Рудэнка belsat.eu
