Беларускі Чырвоны Крыж (БЧК) звярнуўся ў Менскі гарвыканкам з просьбай «аказаць садзейнічанне» у пералічэнні грошай арганізацыі з боку медработнікаў, паведаміў Фонд медычнай салідарнасці.
Фонд апублікаваў адпаведны ліст Менскай гарадской арганізацыі БЧК на імя старшыні камітэту па ахове здароўя Менгарвыканкаму Ігара Юркевіча. Ліст датаваны 24 студзеня.
Чырвоны Крыж просіць у сталічных уладаў дапамогі «у пераходзе на фіксаванае членства ў першасных арганізацыях Беларускага Чырвонага Крыжа ўстаноў аховы здароўя Менску шляхам напісання заяў членамі першасных арганізацый на пералічэнне членскіх узносаў у памеры 1% сярэднямесячнай заработнай платы адзін раз у год».
Ліст падпісаны старшынёй Менскай гарадской арганізацыі БЧК Раманіяй Зорынай.
1 снежня 2023 года Міжнародная федэрацыя таварыстваў Чырвонага Крыжа і Чырвонага Паўмесяца (МФТЧКіЧП) прыпыніла членства БЧК з-за невыканання кастрычніцкага патрабавання федэрацыі вызваліць ад пасады генеральнага сакратара Дзмітрыя Шаўцова, які абвінавачаны ў датычнасці да вывазу дзяцей з Украіны. Шаўцоў таксама адзначыўся рэзананснымі заявамі аб размешчанай у Беларусі расейскай ядравай зброі.
«Адхіленне азначае, што БЧК губляе свае правы члена МФТЧКіЧП. Любое новае фінансаванне ў дачыненні да Беларускага Чырвонага Крыжа таксама будзе прыпынена, – паведаміла міжнародная федэрацыя. – Акрамя таго, БЧК не зможа ўдзельнічаць у Генасамблеі МФТЧКіЧП, а таксама галасаваць або быць абраным на якіх-небудзь статутных сходах МФТЧКіЧП».
БЧК можа быць адноўлены ў правах, як толькі «выканае рашэнне праўлення» і адхіліць генеральнага сакратара ад пасады.
5 студзеня цэнтр «Бюро Медыя» апублікаваў даныя, з якіх вынікае, што БЧК пазбавіцца фінансавання ў памеры прыкладна 4,42 млн рублёў у выніку прыпынення членства ў Міжнароднай федэрацыі таварыстваў Чырвонага Крыжа і Чырвонага Паўмесяца.
Ася Саковіч belsat.eu