Люблінская пракуратура выставіла абвінавачванні чальцам шпіёнскай сеткі з 16 чалавек, паведаміў міністр юстыцыі і генпракурор Польшчы Збігнеў Зёбра. Ім пагражае 10 гадоў пазбаўлення волі.
«Абвінавачаныя на заданне расейскай выведкі ажыццяўлялі выведную дзейнасць у ваколіцах марскіх партоў і вайсковых частак, рыхтавалі дыверсіі і вялі прапагандысцкую дзейнасць супраць Польшчы», – піша Збігнеў Зёбра.
Паводле звестак следства, група працавала ў розных польскіх гарадах са студзеня да сакавіка 2023 года. Абвінавачаныя інфармавалі кіраўнікоў аб выніках выведкі, за што атрымлівалі ўзнагароду. Пра іхнае затрыманне стала вядома ў жніўні.
«Усе абвінавачаныя прызналі сябе вінаватымі і добраахвотна здаліся для адбыцця пакарання», – гаворыцца ў абвінаваўчым заключэнні ў справе.
У сувязі з напружанай сітуацыяй у сферы бяспекі польскія контрвыведнікі пастаянна працуюць на распазнаванне варожай дзейнасці расейскіх і беларускіх службаў, падкрэсліваецца ў дакуменце.
Арсен Рудэнка belsat.eu
