Спявачка Мерыем Герасіменка, якую затрымалі пасля выступу на Зыбіцкай, не выйшла на волю пасля содняў
Беларуская спявачка Мерыем Герасіменка, якую затрымалі пасля выканання песні гурта «Океан Эльзи» ў падтрымку Украіны, не выйшла на волю пасля 15 дзён арышту, паведамляе партал «Zerkalo».
Як паведамілі знаёмыя дзяўчыны, над ёй 10 жніўня адбыўся другі суд паводле артыкулу 24.23 КаАП («Парушэнне парадку арганізацыі або правядзення масавых мерапрыемстваў»). Ёй прысудзілі яшчэ 15 содняў арышту.
Увечары 3 жніўня на тэрасе бару «Банки-Бутылки» на вуліцы Зыбіцкай у Менску прайшоў вулічны канцэрт менскай спявачкі Мэрыем Герасіменкі. Падчас канцэрту яна выканала песню ўкраінскага гурта «Океан Ельзи» – «Обіймі». За гэта на яе абурыліся прапагандысты, назваўшы канцэрт «бэчэбэшным шабашам», а таксама за тое, што спявачка была апранутая ў белую майку з чырвоным сэрцам.
Як стала вядома пазней, кіраўнік бару Андрэй Жук і яшчэ адзін працаўнік затрыманыя за непадпарадкаванне. Андрэя Жука пакаралі 30 соднямі арышту. Разам з ім у судзе Цэнтральнага раёну разгледзелі справу супраць яшчэ аднаго работніка бару: хлопцу прызначылі 14 содняў арышту. Спявачку арыштавалі на 15 содняў.
На наступны дзень пасля выступу ў бар «Банки-Бутылки» прыйшлі ўсе магчымыя службы: санэпідэмічная, МНС і міліцыя.
Алена Рувіна belsat.eu
