«Белсат» атрымаў адказ Надбужанскага аддзелу Памежнай службы Польшчы, што кіруе пунктам пропуску ў Тэрэспалі, на просьбу пракаментаваць гісторыю з беларусамі, якіх прапусцілі праз мяжу толькі з другой спробы. Паводле версіі ведамства, на першым кантролі беларусы казалі пра адсутнасць працы ды грошай і ніяк не згадвалі абставінаў, што датычаць міжнароднай абароны.
Інцыдэнт з беларусамі, якіх не хацелі прапускаць у Тэрэспалі, здарыўся ў канцы сакавіка. Юрыст Міхаіл Куцко, прадстаўнік сужэнцаў, сцвярджаў, што яны ўцякалі ад пераследу за ахвяраванні «BYSOL» і прасілі ў польскіх памежнікаў міжнародную абарону. Нягледзячы на гэта, уезд беларусам забаранілі. Праз содні яны паўторна з’явіліся на кантроль, і з другой спробы ўцекачоў пусцілі.
Афіцыйны прадстаўнік Надбужанскага аддзелу Памежнай службы Польшчы, што кіруе пунктам пропуску ў Тэрэспалі, Дар’юш Сеніцкі ў каментары «Белсату» адзначыў, што заявы аб абароне на тэрыторыі Польшчы памежнікі прымаюць ад любога замежніка, які выразна пра гэта заяўляе і выказвае гатовасць падаць адпаведную заяву.
«Аднак такая заява не можа ўтрымлівацца ў адным слове або сказе, як гэта можна пачуць на відэа», – падкрэсліў Сеніцкі.
Гаворка пра відэа, што беларусы здымалі на памежным пераходзе. На запісе чуваць словы: «Мы адсюль нікуды не паедзем, мы хочам падацца на міжнародную абарону».
Першую спробу мінуць мяжу беларусы здзейснілі ўвечары 22 красавіка.
«Грамадзяне Беларусі пры першай спробе заехаць у Польшчу ў якасці прычыны свайго прыезду называлі толькі прычыны эканамічнага характару, гаворачы, перш за ўсё, пра адсутнасць працы і грошай у краіне паходжання. Яны не спасылаліся ні на якія абставіны, прадугледжаныя Жэнеўскаю канвенцыяй», – сцвярджае прадстаўнік Памежнай службы Польшчы.
Праз содні, увечары 23 красавіка, сужэнцы паўторна з’явіліся на кантролі ў Тэрэспалі.
«На гэты раз яны ўжо выразна заявілі пра мэту свайго прыбыцця. Яны выказалі жаданне падаць заяву аб міжнароднай абароне на тэрыторыі Польшчы. Адпаведная заява ад іх была прынятая», – паведаміў Дар’юш Сеніцкі.
Сеніцкі таксама патлумачыў, чаму да беларусаў не пусцілі юрыста: «Не было даверанасці, і замежнікі не выказалі жадання, каб адвакат прысутнічаў пры прыняцці заявы».
Прадстаўнік беларусаў Міхаіл Куцко пракаментаваў версію памежнікаў. Ён звярнуў увагу на тое, што пры першай спробе сужэнцаў пратрымалі на мяжы 8 гадзінаў, пасля чаго выправілі назад на тэрыторыю Беларусі:
«Калі людзі прыехалі, сказалі, што хочуць працаваць у Польшчы, рашэнне мусіць быць: у вас няма візы – да пабачэння. А іх трымалі восем гадзінаў. Восем гадзінаў яны не маглі разабрацца з прычынамі, пра якія было заяўлена, каб у гэтай сітуацыі прызнаць іхнае перабыванне неабгрунтаваным?»
Да таго ж на памежны пункт не запрасілі перакладчыка, каб беларусы маглі добра растлумачыць сваю сітуацыю.
«Як асобе, якае не ведае польскай мовы, якая ўпершыню прыехала ў Польшчу, растлумачвацца, даваць нейкія падрабязнасці адносна сваёй заявы?» – заўважае юрыст.
Уцекачы месяц таму падалі ў Варшаве ўсе неабходныя дакументы на атрыманне міжнароднай абароны, цяпер чакаюць рашэння польскіх уладаў.
Сяргей Крот belsat.eu