21 траўня ў Варшаве ўручылі медалі Ордэну Пагоні былой палітычнай зняволенай Дар’і Чульцовай, сваякам палітычных вязняў, а таксама родным беларусаў, якія аддалі жыцці за свабоду Беларусі і былі ўзнагароджаныя Радаю БНР пасмяротна.
Падчас цырымоніі, якая прайшла ў Беларускім доме ў Варшаве, кіраўнік Саюзу беларусаў Польшчы Яўген Вапа перадаў медалі Ордэну «Пагоні» сваякам і сябрам палітычных зняволеных Васіля Грудовіка, Уладзіміра Гундара, Дзяніса Івашына і Паліны Шарэнды-Панасюк.
Пасля ўручэння ордэнаў, прызнаных пасмяротна, Мікіты Крыўцова ягонай маці Анджэліцы Кухто, Рамана Бандарэнкі – ягонай стрыечнай сястры Вользе Кучарэнке, а Эдуарда Лобава – ягонаму брату Уладзіславу, многія прысутныя заплакалі.
«Ёсць слёзы, а ёсць вера, надзея і праўда. І веданне таго, што мы разам», – адрэагаваў на эмоцыі Яўген Вапа.
Адзінай ўзнагароджанай асабіста стала журналістка «Белсату», былая палітзняволеная Дар’я Чульцова. Ёй прысудзілі два гады пазбаўлення волі ў калоніі агульнага рэжыму за стрым з разгону сілавікамі людзей, якія 15 лістапада 2020 году прыйшлі на Плошчу Пераменаў ушанаваць памяць Рамана Бандарэнкі. Ордэн для журналісткі Кацярыны Андрэевай, з якой у той дзень працавала Чульцова, Рада БНР перадасць яе сваякам у Беларусь.
Напрыканцы цырымоніі Яўген Вапа параўнаў цяперашнюю сітуацыю з падзеямі стогадовай даўніны, калі, нягледзячы на вайну, беларусы кінулі выклік усім ворагам і гісторыі.
«Людзі сказалі, што хочуць мець сваю дзяржаву. І пайшлі на няроўны бой – як, напрыклад, случчакі, – дадаў Вапа. – І нашыя аднадумцы, якія цяпер гінуць ува Украіне ці сядзяць у беларускіх турмах, добра ведаюць пра выбар свайго лёсу. Гэта выбар сваёй жыццёвай дарогі. Мае сябры, якія раней сядзелі ў турмах ды пераносілі здзекі, ніколі не мелі хістання і расчаравання ад думак на карысць незалежнай Беларусі. І ў гэтым сіла».
Медаль Ордэну Пагоні быў заснаваны ў 2022 годзе для адзначэння грамадзянскіх, ваенных, культурніцкіх і іншых заслугаў перад Беларуссю. Першае ўзнагароджанне адбылося з нагоды Дня Слуцкага збройнага чыну ў лістападзе 2022 года. Другое – 25 сакавіка 2023 года. Агулам на сёння узнагароды прызналі 37 асобам. Сярод іх – актывісты, пратэстоўцы, а таксама беларускія ваяры, якія загінулі на вайне ва Украіне ў 2022 годзе.
Паводле сакратара Рады БНР Алеся Чайчыца, медалі адліваюцца ў Вялікай Брытаніі, у тым жа месцы, дзе вырабляюць афіцыйныя брытанскія ўзнагароды.
Ян Лісіцкі belsat.eu