Суд пастанавіў канфіскаваць у «Новага зроку» 17 мільёнаў рублёў. І гэта толькі за 2022 год
20 сакавіка эканамічны суд Менску аштрафаваў на буйную суму пазбаўленую ліцэнзіі клініку «Новы зрок». У яе таксама канфіскуюць шматмільённы прыбытак за цэлы год, піша «Onliner».
Суд прыйшоў да высновы, што ўвесь 2022 год клініка працавала без абавязковай ліцэнзіі, за што прадугледжаная адказнасць паводле ч. 1 арт. 13.3 КаАП. У выніку медцэнтр аштрафавалі на 500 базавых велічыняў, або 20 000 рублёў. Таксама пастанавілі канфіскаваць 100 % сумы даходу – 17 063 621,02 рубля.
Заснавальнік сеткі Алег Каўрыгін адзначаў, што ўлады абвінавачваюць «Новы зрок» у працы без ліцэнзіі з 2011 года. Ён чакае, што будзе яшчэ 11 такіх судоў, на якіх для кожнага года будуць «складаць, лічыць даходы і прымаць пастанову наконт канфіскацыі».
«У лік гэтага канфіскуюць усё абсталяванне, будынкі і гэтак далей. Як я ўжо казаў, мэта – забраць увесь бізнес, ды яшчэ каб засталіся вінныя», – сказаў Каўрыгін.
Абвінавачанні ўладаў ён называе абсурдам, падкрэсліваючы, што з такім кантролем у сферы прыватнай медыцыны прадпрыемства не магло б прапрацаваць пазапраўна 12 гадоў. На ягоную думку, улады нічога не змаглі знайсці супрацьзаконнага, «таму выкруцілі так».
У красавіку 2023 года супраць фактычнага ўладальніка медцэнтру «Новы зрок», які жыве ў Літве, і чацвярых працаўнікоў медустановы была распачатая крымінальная справа за нібыта выплаты працаўнікам заробкаў у канвертах. На маёмасць падазраваных быў накладзены арышт. А 27 ліпеня Міністэрства аховы здароўя пастанавіла спыніць дзейнасць медцэнтру. Пасля гэтага «Новы зрок» паведаміў, што ідзе з рынку Рэспублікі Беларусь.
Якуб Хруст belsat.eu
