Беларуская грамада ўпершыню ў Польшчы змагла ўдзельнічаць у праваслаўнай літургіі па-беларуску. Набажэнства прайшло ў капліцы святога Рыгора Пэрадзэ ў варшаўскім раёне Ахота. Пра гэта паведамляе радыё «Doxa».
Літургію ўзначаліў праваслаўны святар айцец Андрэй Кузьма. Паводле яго слоў, дзякуючы службам ствараецца суполка беларусаў, якая будуе новую, дэмакратычную дзяржаву.
Як дадае Наталля Гарковіч, якая была вымушаная з’ехаць з Беларусі па палітычных прычынах, на набажэнстве прысутнічала шмат беларусаў. Паводле яе, служба аб’ядноўвае беларускіх патрыётаў.
Набажэнствы на беларускай мове будуць адбывацца раз на месяц, наступныя адбудуцца 30 красавіка і 14 траўня.
Якуб Хруст belsat.eu