У Свята-Елісавецінскім манастыры назвалі праведным гневам аплявуху ад манашкі барабаншчыку ў Віцебску
У Свята-Елісавецінскім манастыры пракаментавалі «Белсату» тузаніну ў Віцебску. Там назвалі праведным гневам аплявуху ад манашкі барабаншчыку. У манастыры заявілі, што яе справакавалі.
Інцыдэнт адбыўся ў Віцебску падчас вулічнага выступу барабаншчыкаў. На відэа чутно і бачна, як незадаволеныя манашкі крыкам выганялі музыкаў, а адзін з іх нават атрымаў удар па твары.
У сацсетках выказалі меркаванне, што барабаншчыкі і гледачы заміналі гандлю ў царкоўнай лаўцы, што працавала побач. У Свята-Елісавецінскім манастыры гэтую версію адмаўляюць:
«Учынілі танцы і шум на прыступках храму. І ніхто не рэагаваў на спакойныя просьбы: калі ласка, памяняйце месца размяшчэння выступу і танцаў. Сказалі, што мяняць не будуць. Ніхто – ні міліцыя, ні людзі побач – усе былі абыякавыя да таго, што адбываецца. Мабыць, лічаць, што гэта нармалёва».
У Свята-Елісавецінскім манастыры таксама заявілі, што барабаншчыкі сабралі натоўп, і там магла паўтарыцца трагедыя на Нямізе:
«Там пачалася цісканіна, і магла здарыцца такая ж трагедыя, як на Нямізе. Таму, каб пазбегчы трагедыі, давялося іх з гэтага месца папрасіць сысці».
У манастыры сцвярджаюць, што манашку, якая ўдарыла хлопца-барабаншчыка, справакавалі:
«Натуральна, калі чалавек сказаў: я нікуды не пайду і буду далей тут усё гэта ладзіць, то гэта, вядома, выклікала такі праведны гнеў».
Зрэшты, учынак манашкі ўсё ж стане прычынаю ўнутранага правярання, сказаў суразмоўца «Белсату»: «Для гэтага маецца кіраўніцтва, усё правераць».
Свята-Елісавецінскі манастыр Беларускага экзархату Маскоўскага патрыярхату не ўпершыню трапіў у скандал. Гэтая рэлігійная арганізацыя неаднаразова ладзіла імпрэзы, каб падтрымаць расейскую агрэсію ва Украіне, манашкі збіраюць для расейскіх жаўнераў грошы, медыкаменты, адзенне і абутак.
Сяргей Крот belsat.eu
