Старшыня Еўракамісіі Урзуля фон дэр Ляен заявіла, што шосты пакет санкцыяў ЕЗ можа абмежаваць працу «Сбербанку» Расеі, а таксама механізм нафтавага эмбарга супраць Масквы. Пра гэта яна заявіла газеце «Bild am Sonntag», паведамляе DW.
«Мы вывучаем расейскі банкаўскі сектар, асабліва – «Сбербанк», на долю якога прыпадае 37 % гэтага сектару, – адзначыла яна. – І, вядома, пытанні, звязаныя з энергетыкай», – зазначыла старшыня Еўракамісіі.
Паводле Урзулі фон дэр Ляен, Еўракамісія распрацоўвае разумныя механізмы, каб эмбарга на нафту таксама магло быць уключана ў наступны этап санкцыяў.
Старшыня Еўракамісіі адзначыла, што ніколі яшчэ Еўразвяз «не дзейнічаў так згуртавана, рашуча і энергічна, як цяпер».
Фон дэр Ляен выказала меркаванне, што ўведзеныя ў дачыненні Масквы санкцыі ўжо даюць эфект. Паводле яе, экспарт у Расею ўпаў на 70 %, валавы ўнутраны прадукт РФ знізіцца на 11 %, а дэфолт у Расеі – толькі пытанне часу. «Гэтай вайной Пуцін знішчае сваю ўласную краіну і будучыню яе народу», – адзначыла фон дэр Ляен.
РР belsat.eu