Праваабаронцы «Вясны» сцвярджаюць, што саліста гурта «Nizkiz» Аляксандра Ільіна асудзілі ўжо двойчы: 8 і 10 студзеня нібыта за распаўсюд экстрэмісцкіх матэрыялаў. «Еўрарадыё» са спасылкаю на ўласныя крыніцы піша, што арышт быў адзін, адпаведнае рашэнне суд прыняў 10 студзеня.
Праваабронцы пішуць, што Аляксандра Іліна судзілі другі раз запар. Аднак, паводле «Еўрарадыё», гэта быў першы суд.
6 студзеня ў Магілёве былі затрыманыя трое ўдзельнікаў гурта «Nizkiz»: вакаліст і аўтар песень Аляксандр Ільін, бас-гітарыст Сяргей Кульша і бубнач Дзмітрый Халяўкін.
Паводле праваабаронцаў, 8 студзеня ў судзе Ленінскага раёну Магілёва музыкаў судзілі паводле артыкулу 19.11 КаАП («Распаўсюд экстрэмісцкіх матэрыялаў»). Падобна, што ў той дзень вынеслі прысуд толькі Сяргею Кульшу і Дзмітрыю Халяўкіну. Вынік пасяджэння пакуль невядомы, але на волю музыкі з таго часу не выйшлі. Судзіла іх Вікторыя Палякова.
Раней паведамлялі, што музыкаў затрымалі па вяртанні ў Беларусь. Яны працягвалі жыць на радзіме, але часам выязджалі на канцэрты за мяжу.
Затрыманні і правяранні на мяжы – ужо звычайная практыка ў Беларусі. За 2023 год на мяжы затрыманыя мінімум 207 чалавек. А «размовы» з тымі, хто прыязджае ў краіну, вядуцца кожны дзень, адзначаюць праваабаронцы.
Арсен Рудэнка belsat.eu
