Прадстаўнікі Каардынацыйнай рады прапанавалі Аляксандру Азараву зладзіць незалежны фінансавы аўдыт установы «Fundacjа ByPol». Таксама ў Радзе гатовыя правесці слуханні аб дзейнасці прадстаўніка АПК для аднаўлення законнасці і правапарадку.
Раней Аляксандр Азараў звярнуўся да КР з прапановаю накіраваць трох сваіх прадстаўнікоў у Назіральную раду «Fundacji ByPol», якія могуць дапамагчы зладзіць фінансавы аўдыт. Але КР устрымалася ад гэтай прапановы, бо да 1 жніўня сёлета запланаваныя слуханні КР аб выніках дзейнасці прадстаўнікоў Аб’яднанага пераходнага кабінету, у тым ліку Аляксандра Азарава. Таму ўзнікаюць некаторыя складанасці, сярод якіх і час, паколькі дзеля фінансавага аўдыту патрэбна два месяцы.
Дзеля вырашэння спрэчных пытанняў Каардынацыйная рада прапанавала стварыць працоўную групу, якая мае спачатку зладзіць слуханні аб дзейнасці прадстаўніка АПК для аднаўлення законнасці і правапарадку. Што да аўдыту, то назіральная рада «Fundacji ByPol» спачатку мае змяніць свой статут, пасля чаго прадстаўнікі КР змогуць дапамагчы правесці фінансавы аўдыт.
Алена Аляксандрава belsat.eu
