Прэм’ер-міністарка Літвы папярэдзіла аб наступствах забароны на выдачу ВНЖ беларусам
Кіраўніца літоўскага ўраду Інгрыда Шыманіце выступіла за «больш глыбокую дыскусію» ў пытанні ўніфікацыі санкцыяў супраць беларусаў і расейцаў. Яна папярэдзіла, што ў выпадку ўскладнення легалізацыі грамадзянаў Беларусі ў Літве ўзнікне нястача працоўных рук, піша «Delfi».
«Мяркую, патрабуецца больш глыбокае абмеркаванне таго, якую праблему мы спрабуем развязаць. Таму што гэта не толькі пытанне загружанасці ўстановаў, ёсць таксама пытанні шырэйшага кантэксту», – адзначыла прэм’ер-міністарка Літвы Інгрыда Шыманіце, адказваючы на пытанні журналістаў у Сейме.
Яна нагадала палітычную пазіцыю Вільні ў стаўленні да суседзяў: не атаясамліваць народ і рэжым у Беларусі. Шыманіце таксама кажа, што бальшыня беларусаў у Літве – не палітычныя ўцекачы, а працоўныя мігранты:
«Гэта людзі, якія працуюць у будаўніцтве і транспарце. Відавочна, што калі на рынку працы не застанецца мігрантаў, то нас, імаверна, чакае вельмі доўгая і цяжкая дыскусія з нашымі бізнес-асацыяцыямі, ідэя якіх складаецца ў тым, што міграцыю трэба палегчыць, бо працоўнай сілы не хапае».
Кіраўніца ўраду Літвы выказала ўпэўненасць, што пасля дыскусіяў «будуць прапанаваныя лепшыя развязанні, якія дапамогуць дасягнуць не адну мэту, а некалькіх мэтаў адначасова».
Выданне «Delfi» адзначае, што зарэгістраваныя ў парламенце антыбеларускія папраўкі не падтрымала спікерка Сейму Вікторыя Чміліце-Нільсэн.
«Гэта было б вельмі дрэнным сігналам для беларускай апазіцыі, якая тут жыве, для ўсіх тых, каго Літва запрасіла, сказаўшы, што нам важна дапамагаць людзям, якіх пераследуе рэжым Лукашэнкі», – заявіла яна журналістам.
Чміліце-Нільсэн упэўненая, што калі беларусы сапраўды пагражаюць нацыянальнай бяспецы, то замест новых абмежавальных захадаў варта даць больш рэсурсаў і грошай спецслужбам – «усё неабходнае, каб кантраляваць людскія плыні». Ускладненне легалізацыі грамадзянаў Беларусі не развяжа заяўленай праблемы, падкрэсліла спікерка Сейму.
Раней віцэ-спікер Сейму Паўлюс Саўдаргас, старшыня камітэту нацыянальнай бяспекі і абароны Лаўрынас Касчунас і сябра камітэту замежных справаў Аўдронюс Ажубаліс унеслі ў парламент законапраект, які сур’ёзна абмяжуе выдачу беларусам часовага віду на жыхарства.
Сцяпан Кубік belsat.eu
