Як даведаўся «Белсат», справу супраць старшыні Саюзу палякаў у Беларусі спынілі. Паводле нашых звестак, лукашэнкаўская пракуратура праз два гады пасля арышту не выявіла «прыкметаў злачынства».
Анджэліка Борыс і Анджэй Пачобут былі затрыманыя ўвесну 2021 года. Анджэліку Борыс вызвалілі з-пад варты летась у сакавіку. Супрацоўнікі спецслужбаў папросту адвезлі яе з Менску ў вёску Грабяні Гарадзенскай вобласці, дзе ёй загадалі заставацца пад неафіцыйным хатнім арыштам у доме ейнай маці.
Як даведаўся «Белсат», кіраўніцу Саюзу палякаў разам з маці выклікалі ў Менск. Там Анджэліцы Борыс уручылі дакумент аб спыненні справы «ў сувязі з адсутнасцю складу злачынства». Таксама ёй паабяцалі вярнуць усе рэчы, вынятыя падчас следства.
«Улічваючы, што Анджэй Пачобут быў асуджаны на 8 гадоў у той жа справе, гэта ставіць Саюз палякаў у Беларусі і яго эмігранцкіх актывістаў у цяжкае становішча і дазваляе разгуляць гэтую карту», – сказала дырэктарка тэлеканалу «Белсат» Агнешка Рамашэўская-Гузы.
Разам з Пачобутам і Борыс у сакавіку 2021 года былі арыштаваныя Ірына Бярнацкая і Марыя Цішкоўская з Саюзу палякаў, а таксама Ганна Панішава, актывістка польскай меншасці з Берасця.
Бярнацкай, Цішкоўскай і Панішавай удалося пакінуць Беларусь у 2021 годзе дзякуючы намаганням польскіх уладаў. Аднак у іх няма магчымасці вярнуцца ў краіну свайго грамадзянства, Беларусь.
Тым часам у МЗС Польшчы пацвердзілі інфармацыю пра тое, што з Анджэлікі Борыс знялі ўсе абвінавачванні. Спікер ведамства Лукаш Ясіна напісаў у Twitter, што гэта «крок у правільным кірунку».
«Мы спадзяемся, што такія ж пастановы будуць вынесеныя і ў дачыненні Анджэя Пачобута і іншых зняволеных. Мы не забываемся пра вас», – адзначыў афіцыйны прадстаўнік ведамства.
MaH belsat.eu