Памёр рэжысёр-мультыплікатар і мастак мультыплікацыйнага кіно Леанід Шварцман. Пра гэта паведаміў шэф-рэдактар студыі «Саюзмультфільм» Сяргей Капкоў, перадае ТАСС.
Ён памёр у шпіталі пасля хваробы ва ўзросце 101 года.
Леанід Шварцман нарадзіўся ў 1920 годзе ў Менску ў сям’і бухгалтара Арона Шварцмана, нарадзінца Вільні, і хатняй гаспадыні Рахілі Шварцман родам з Менску. Пры нараджэнні яго назвалі Ізраілем, аднак ён змяніў імя ў 40 гадоў. У сямʼі размаўлялі на ідышы. Падлеткам ён пераехаў у Ленінград, дзе ўжо асталявалася ягоная старэйшая сястра. У 1941 годзе Шварцман закончыў навучанне ў школе пры Ленінградскім інстытуце жывапісу, скульптуры і архітэктуры.
У 1945 годзе ён прыехаў у Маскву, паступіў ва Усерасейскі дзяржаўны інстытут кінематографіі (ВГИК), а з 1948 года ўжо працаваў на кінастудыі «Саюзмультфільм».
Леанід Шварцман быў мастаком-пастаноўшчыкам і рэжысёрам-мультыплікатарам многіх савецкіх мультфільмаў. Сярод ягоных працаў – «Пунсовая кветачка», «38 папугаяў», «Снежная каралева», «Кацяня на імя Гаў», «Залатая антылопа» і «Дзядзя Сцёпа – міліцыянер».
Ён таксама браў удзел у стварэнні візуальнага вобразу Чабурашкі для мультфільму «Кракадзіл Гена» ў 1969 годзе.
Шварцман быў узнагароджаны званнем народнага мастака Расеі, а ў 2020 годзе яго ўзнагародзілі ордэнам Аляксандра Неўскага з фармулёўкай «за вялікі ўнёсак у развіццё айчыннай культуры і мастацтва, шматгадовую плённую дзейнасць». Таксама Шварцман быў ганаровым дырэктарам Маскоўскага музею анімацыі.
Алена Рувіна belsat.eu