Вынік: 142 паваленыя дрэвы і 10 знесеных дахаў, але пацярпелых няма.
Пасля наймацнейшай залевы і парываў ветру да 15-20 м/с у Гомлі і трох раёнах вобласці МНС зафіксаваў 142 падзенні дрэваў. З іх 134 упалі ў самім Гомлі, паведамляе канал «Гомельщина официально».
Працаўнікі МНС 10 разоў за дзень выязджалі прыбіраць і распілоўваць паваленыя дрэвы. Як мінімум у шасці выпадках у Гомлі дрэвы ўпалі на аўтамабілі, у дзесяці выпадках – на дахі будынкаў.
Праз непагадзь там-сям знікала электраэнергія, якая, аднак, «аператыўна аднаўляліся працаўнікамі РУП «Гомельэнерга».
Са звестак МНС, пацярпелых няма.
«Гадзіны чатыры ліло бесперапынна: я была проста заблакаваная ў краме з цэлым натоўпам такіх жа людзей – выйсці ніхто не наважваўся», – распавяла «Белсату» жыхарка Гомля. – Я яшчэ ніколі не бачыла такога магутнага дажджу і ветру! Шчыра кажучы, страшна было вяртацца дадому: спачатку трэба было неяк ехаць на аўце па гэтай "Венецыі", каб упэўніцца, што мой дом не знесла там ці не заваліла дрэвамі. А потым я ўзгадала, што не ўпусціла ў дом ката – і панеслася хутчэй. Але дзякуй Богу, усё абышлося, хоць крыху і заліло сцяну ў калідоры».
Нагадаем, 3 чэрвеня на Гомель і вобласць найшла моцная залева, што затапіла дарогі і дамы. У сацыяльных сетках беларусы паказвалі, як плывуць у горадзе на байдарках і спрабуюць уратаваць кватэры ад вады, што цячэ са столі.
«У выніку падзення дрэваў выпадкаў траўмавання людзей не зафіксавалі. Выпадкаў вымыкання электразабеспячэння на гэты момант не зафіксавалі», – пісала 3 чэрвеня «Гомельщина официально».
Людзі паказвалі, што адбываецца на дварэ і ў дамах. Напрыклад, у адным са шматпавярховікаў вымакнуць можна было нават не выходзячы з пад'езду, у адной з кватэраў таксама цякло проста са столі. Хтосьці ставіўся да сітуацыі з гумарам і плыў дарогаю на байдарцы.
Тэса Анэйда belsat.eu
