Урад Беларусі сваёй пастановай № 212 ад 11 красавіка, якую сёння апублікавалі на Нацыянальным прававым інтэрнэт-партале, ізноў павялічыў долю дзяржавы ў шэрагу прамысловых прадпрыемстваў.
Гаворка ідзе пра цэментныя, шкляныя і дрэваапрацоўчыя заводы: ААТ «Беларускі цэментны завод», ААТ «Барысаўдрэў», ААТ «Гомельшкло», ААТ «Івацэвічдрэў», ААТ «Краснасельскбудматэрыялы», ААТ «Крычаўцэментнашыфер» і ААТ «Светлагорскі цэлюлозна-кардонны камбінат».
Павелічэнне долі дзяржавы ў іх статутных фондах ёсць вынікам аказанага ім дзяржпадтрымання ў 2024 годзе. Гэта робіцца штогод згодна з указамі Аляксандра Лукашэнкі ад 2016 і 2019 гадоў аб падтрыманні стратэгічна важных прадпрыемстваў.
Агульная сума аказанай ім дзяржавай дапамогі ў 2024 годзе склала 46,55 млн рублёў. Найбольшую суму, або амаль 16 млн рублёў, атрымаў «Крычаўцэментнашыфер». Грошы выплачваюцца з дзяржаўнага бюджэту.
Нагадаем, што ўкідванне грошай у цэмент пачалося ў 2006 годзе. З 2006 да 2011 года ў мадэрнізацыю трох заводаў уклалі 1,2 млрд долараў ЗША, але на планаваныя 10 млн тонаў цэменту на год не выйшлі. Аб'ём вытворчасці за 11 месяцаў 2024 года – удвая меншы.
Не прызнаўшы правалу першай мадэрнізацыі ў галіне, рэжым плануе чарговую. Закрываць заводы праз страты ніхто не збіраецца. Кіраўнікі перыядычна атрымліваюць дзяржаўныя ўзнагароды і штогод маюць падтрыманне.
Падобная сітуацыя і з дрэваапрацоўчай ды шкляной галінамі.
Якуб Хруст belsat.eu
