«Больш, чым адзінкі». Польшча пачала адмаўляць у прыёме прашэнняў аб прытулку

Дакладную колькасць адмоваў Сікорскі не назваў.

Кіраўнік МЗС падкрэсліў, што папраўкамі ў закон у Польшчы было прыпыненае не права на прытулак, а права на падачу прашэнняў аб абароне «ў вельмі абмежаваным часе і на абмежаванай тэрыторыі»:

«Нагадваю, гэтыя асобы па-ранейшаму маюць права на прытулак і права прасіць міжнародную абарону ў Польшчы. Гэта можна зрабіць у польскім консульстве ў Менску ці Маскве. Гэта асобы, якіх Расея сцягвае з Блізкага Усходу, прывозіць у Беларусь, каб яны гвалтоўна прарываліся ў Еўразвяз. Мы гэтага не дазваляем».

Сікорскі паведаміў, што апошнім часам назіраецца ўзмацненне атакаў мігрантамі ўсходняй мяжы Польшчы.

«Папярэдні ўрад пачаў будаваць плот, ён аказаўся слабым, мы яго ўзмацнілі», – зазначыў міністр.

Прэзідэнт Польшчы Анджэй Дуда 26 сакавіка падпісаў Закон аб часовым і тэрытарыяльным абмежаванні права на прыём хадайніцтваў аб міжнароднай абароне. Прашэнні не будуць прымаць у мігрантаў на польска-беларускай мяжы цягам 60 дзён. Тэрмін можа быць працягнуты яшчэ на 60 дзён паводле ўхвалення Сейму.

Памежная служба, нягледзячы на абмежаванні, будзе прымаць заявы аб міжнароднай абароне ад няпоўнагадовых без суправаджэння дарослых, цяжарных жанчын і асобаў, якім можа спатрэбіцца адмысловае стаўленне, асабліва праз іхны век або стан здароўя. Абмежаванне не будзе датычыць чалавека, якому, на думку памежнай службы, «сапраўды пагражае сур'ёзная шкода ў краіне, з якой ён ці яна беспасярэдне прыбылі ў Польшчу».

Бальшыню беларусаў новаўвядзенні не павінны датычыць. Кіраўніца ініцыятывы «Partyzanka» Ганна Маціеўская раней падкрэслівала, што праект прадугледжвае беспасярэдняе выключэнне для грамадзянаў Беларусі. То бок беларусы будуць мець магчымасць надалей падаваць заявы на абарону ў памежнай зоне, адзначала яна.

Марыя Міхалевіч belsat.eu