Каля памежнага пераходу «Тэрэспаль» («Берасце») а 12-й гадзіне дня ўезду ў Польшчу чакалі 815 аўтамабіляў , паведамляе Дзяржаўны памежны камітэт Беларусі. Некалькі дзён раней чэргі дасягалі больш за 2000 тысячы машынаў, людзі рэгістраваліся ў электроннай чарзе за тыдзень, каб не спазніцца са справамі. Аўтобусных чэргаў няма.
Пакуль мяжу на аўтамабілях праязджаюць толькі тыя, хто рэгістраваўся ў чарзе некалькі дзён таму. Адзін з кіроўцаў распавядае ў тэматычным чаце, што раніцаю 16 студзеня быў у электроннай чарзе амаль на 1500-м месцы. На мяжу выклікалі толькі каля дзесяці вечара 18 студзеня, а прайсці польскіх памежнікаў удалося а трэцяй гадзіне ночы 19 студзеня. Выходзіць, чаканне і мяжа занялі амаль трое содняў.
Калі ехаць на машыне з Польшчы ў Беларусь, то мяжа займае 2,5 – 3 гадзіны, дзеляцца ў чаце аб праходжанні мяжы.
Аўтобусных чэргаў у бок Польшчы няма, распавядае Дзяржпамежкамітэт.
«Можа і нуль [аўтобусаў у чарзе], але ўсё ўнутры вельмі сумна, палякі не працуюць нармальна. Мяжа зойме гадзінаў 11–12», – распавядаюць пасажыры.
Іншы пасажыр аўтобуса апісвае маршрут больш падрабязна: 18 студзеня а 13:00 аўтобус выехаў з Гомля, а 5:30 раніцы ўжо быў у Варшаве. Уся дарога заняла 16,5 гадзіны. Мяжа заняла каля 4 гадзінаў.
З боку Польшчы ў Беларусь таксама няма аўтобусных чэргаў, а на мяжы трэба стаяць каля дзвюх гадзінаў, дзеляцца пасажыры.
Арсен Рудэнка belsat.eu
