«Палітычны, эканамічны і маральны ціск на рэжым Лукашэнкі».
На сайце Кангрэса ЗША апублікавалі праект новага Акта аб дэмакратыі ў Беларусі. Прадстаўнік Аб’яднанага пераходнага кабінету ў замежных справах Валер Кавалеўскі заявіў, што дакумент адыгрывае важную ролю ў падтрыманні дэмакратычных сілаў Беларусі праз «палітычны, эканамічны і маральны ціск на рэжым Лукашэнкі».
Упершыню ЗША ўхвалілі Акт аб дэмакратыі, правах чалавека і суверэнітэце Беларусі ў 2004 годзе, у 2006-м, 2011-м і 2020-м у дакумент уносілі змены. Такім чынам, цяперашняя рэдакцыя будзе пятай. Праект, які мае быць прыняты да канца года, апублікавалі на сайце Кангрэса ЗША.
У Акце прапісаныя ўсе «дасягненні» цяперашніх уладаў. У новай рэдакцыі згадваюцца:
Акт патрабуе прыцягнуць да адказнасці «незаконны рэжым Лукашэнкі за суўдзел у агрэсіі супраць Украіны праз механізмы міжнароднага правасуддзя», вызваліць без папярэдніх умоваў усіх палітычных вязняў і заклікае да правядзення прэзідэнцкіх і парламенцкіх выбараў паводле стандартаў АБСЕ.
У папярэдняй рэдакцыі Акт прызнаў Каардынацыйную раду «легітымным інстытутам для ўдзелу ў дыялогу аб мірным перадаванні ўлады», цяпер такой жа структурай прызнаны Пераходны кабінет:
,,«Прызнаць Каардынацыйную раду і Аб’яднаны пераходны кабінет у якасці легітымных інстытутаў для ўдзелу ў дыялогу аб мірным перадаванні ўлады і падтрымоўваць гэтыя інстытуты да і падчас такога перадавання, калі яно адбудзецца».
Дакумент таксама прадугледжвае, што ЗША ў супрацы з ЕЗ, Вялікай Брытаніяй, Канадай ды іншымі краінамі і міжнароднымі арганізацыямі працягнуць уводзіць санкцыі за «падрыў дэмакратычных працэсаў у Беларусі», за парушэнне правоў чалавека і спрыянне расейскаму ўварванню.
Акрамя таго, Злучаныя Штаты маюць прызначыць спецпрадстаўніка для Беларусі і працягваць гэтак званы Стратэгічны дыялог з дэмакратычнымі сіламі, каб дабіцца адказнасці для ўдзельнікаў рэпрэсіяў, пашырыць партнёрства з беларускім народам шляхам інвестыцыяў у такія праекты, як адмысловае прадстаўніцтва ў Вільні Агенцтва ЗША ў справе міжнароднага развіцця (USAID), а таксама падтрымоўваць культурніцкія праграмы, прысвечаных абароне беларускай мовы, культуры і нацыянальнай ідэнтычнасці.
«Я ўпэўнены, што гэты дакумент адыгрывае важную ролю ў падтрыманні дэмакратычных сілаў Беларусі, аказваючы палітычны, эканамічны і маральны ціск на рэжым Лукашэнкі, садзейнічаючы міжнароднай салідарнасці і намаганням у дэмакратычных пераўтварэннях у нашай краіне», – так праект пракаментаваў прадстаўнік Аб’яднанага пераходнага кабінету ў замежных справах Валер Кавалеўскі.
Ён упэўнены, што Акт аб дэмакратыі ў Беларусі «узмацняе ціск на рэжым Лукашэнкі з боку міжнароднай супольнасці і будзе садзейнічаць далейшым санкцыям і ізаляцыі рэжыму».
Сцяпан Кубік belsat.eu
