Трапіць з Беларусі ў Польшчу ўсё цяжэй, чарга на польскай мяжы разрастаецца, з’явілася чарга на Літву, а да таго ж у пункце пропуску «Тэрэспаль» рэмантуюць дарогу.
Што ў афіцыйных крыніцах
Паводле Памежнага камітэту Беларусі, чэргі на выезд з Беларусі 26 чэрвеня наступныя.
• «Грыгароўшчына – Патэрніекі» (Латвія). Чаргі легкавікоў і аўтобусаў няма, у чарзе цяжкавікоў – ад 460 да 500 аўтаў.
• «Каменны Лог – Мядзінінкай» (Літва). У чарзе – ад 130 да 160 легкавікоў, чаргі аўтобусаў няма, у чарзе цяжкавікоў – 550–580 аўтаў. Чаргі легкавікоў амаль не было ў пачатку тыдня, але ўдзень 25 чэрвеня яна пачала разрастацца і пакуль не знікла.
• «Беняконі – Шальчынінкай» (Літва). У чарзе – ад 50 да 120 легкавікоў, чаргі аўтобусаў няма, у чарзе цяжкавікоў – 470–480 аўтаў. Як і ў «Каменным Логу», чарга стала разрастацца ўдзень 25 чэрвеня.
• «Берасце – Тэрэспаль» (Польшча). У чарзе – 2300–2335 легкавікоў, ад 18 да 31 аўтобусаў. Агромістая чарга – больш за тысячу легкавікоў – стаіць з пачатку чэрвеня.
• «Казловічы – Кукурыкі» (Польшча). Чаргі фураў няма, хоць дзень раней была чарга з 80–160 аўтаў.
Паводле польскіх памежнікаў, 26 чэрвеня на выезд з Польшчы ў Беларусь час чакання для легкавікоў і аўтобусаў складае 2 гадзіны, для цяжкавікоў – без чакання.
Паводле літоўскіх памежнікаў, у Мядзінінкаі ў чарзе зарэгістраваныя 83 цяжкавікі, у Шальчынінкаі – 39 цяжкавікоў, а легкавікоў і аўтобусаў у чарзе няма.
У латышскіх памежнікаў лічыльнік не працуе. Імаверна, адключыўся лічыльнік і ў грузавога парталу Cargo.lv.
Што пішуць у чатах
«Грыгароўшчына – Патэрніекі». Мяркуючы з аднаго з чатаў, чэргаў амаль няма, пераход мяжы займае менш за паўтары гадзіны.
«Каменны Лог – Мядзінінкай». Паводле аднаго з чатаў, аўтобусам з Беларусі ў Літву мяжу можна прайсці за 2–4 гадзіны, назад – за 1,5–4 гадзіны (каля дзвюх гадзінаў можа сысці на чаканне тых, каго забралі на допыт). Аўтамабільная чарга з літоўскага боку адносна невялікая, некалькі дзясяткаў машынаў. Але з беларускага – сапраўды каля паўтары сотні машынаў. Уначы з беларускага боку працавалі вельмі павольна, амаль нікога не выклікалі. Карыстальнікі таксама наракаюць на марудную аплату выезду Пераход мяжы з Беларусі ў Літву аўтамабілем займаў 15–18 гадзінаў, з Літвы ў Беларусь – каля 9 гадзінаў.
Паводле прагнозаў іншага чату, машынаю з Беларусі ў Літву пераход мяжы можа заняць 26 гадзінаў, у адваротны бок – 6 гадзінаў; аўтобусам – 3 гадзіны ў любы бок.
«Беняконі – Шальчынінкай». У чатах пра гэты пераход таксама наракаюць на працу беларускіх памежнікаў, але скардзяцца і на літоўскую мытню. Чэргі тут меншыя, чым у «Каменным Логу», але таксама немалыя: у адным чаце налічылі з беларускага боку 50 машынаў перад «назапашвальнікам». З Беларусі ў Літву машыны чакаюць выезду больш за 12 гадзінаў, з Літвы ў Беларусь – больш за 9 гадзінаў. Аўтобусам пераход мяжы можа заняць 3,5 гадзіны.
Іншы чат дае такі прагноз: машынай у Літву – 11 гадзінаў, у Беларусь – 8,5 гадзіны; аўтобусам у Літву – 2,5 гадзіны, у Беларусь – 3 гадзіны.
«Берасце – Тэрэспаль». Аўтобусаў у чарзе з беларускага боку сапраўды больш за два дзясяткі. У адным з чатаў уначы налічылі аж сотню, але ўдзень – ужо значна менш. З польскага боку ў чарзе менш за 10 аўтобусаў. Пішуць, што з беларускага боку можна падсесці ў аўтобус, найбліжэйшы да пункту пропуску, але за гэта кіроўцы просяць 140 рублёў (бяруць і долары, і еўры). На пераход мяжы з Беларусі ў Літву аўтобусу трэба каля 11 гадзінаў, калі пашанцуе, а калі не – больш за 18. З Польшчы ў Беларусь пераход мяжы аўтобусам займае ад 5 да 13,5 гадзіны. Вінавацяць як беларускіх памежнікаў, так і польскіх.
Аўтамабіляў з польскага боку – дзясятак-другі, але пераход мяжы ўсё адно займае 6–8 гадзінаў. З беларускага ж боку машынам даводзіцца чакаць каля пяці дзён: сам пераход мяжы займае тыя ж 6–8 гадзінаў, але перад гэтым – віртуальная «зона чакання».
«Я правільна разумею, што нават калі чарга стане 3000 ці 4000 машын, то больш за 500 на дзень усё роўна не ўдасца прапускаць?» – пытае карыстальнік у адным з чатаў. Яму адказваюць: «У студзені былі 2600, хутчэй працаваць не сталі».
Іншы чат прагназуе: машынаю з Беларусі ў Польшчу пераход мяжы зойме 127,6 гадзіны, у адваротны бок – больш за 9 гадзінаў; аўтобусам з Беларусі ў Польшчу – 11,5 гадзіны, назад – каля 15 гадзінаў.
У «Тэрэспалі» 25 чэрвеня пачалі рамонт дарожнага пакрыцця, але на гэта ў чатах не скардзяцца – падобна, гэта не надта запавольвае чаргу, працу памежнікаў і мытнікаў.
Памежны камітэт Беларусі, як звычайна, вінаваціць замежных калегаў у невыкананні нормаў пропуску машынаў: маўляў, палякі прынялі толькі траціну ад нормы машынаў за апошнія два дні. Польскія памежнікі звычайна наракаюць на працу беларускіх, а праблемы са свайго боку тлумачаць тым, што польская памежная служба вымушаная скіроўваць афіцэраў з пункту пропуску ў Тэрэспалі на ахову мяжы, каб перадухіліць нелегальны пераход мяжы мігрантамі, якія намагаюцца трапіць у суседнюю краіну з тэрыторыі Беларусі.
Алесь Наваборскі belsat.eu
