Міністэрства замежных справаў Літвы накіравала Міністэрству замежных справаў Беларусі ноту. У дакуменце Вільня патрабуе ад Менску не эксплуатаваць другога энергаблоку, паколькі ядравая бяспека, экалагічныя стандарты і патрабаванні не выконваюцца.
Літва лічыць непрымальным падыход Беларусі да гарантавання ядравай бяспекі. У сувязі з гэтым МЗС гэтай краіны накіравала ў МЗС Беларусі ноту з заклікам не ўключаць у энергасетку другога энергаблоку БелАЭС.
У ноце літоўскі бок звяртае ўвагу на тое, што падчас будаўніцтва другога энергаблоку ўзнікалі праблемы ядравай бяспекі, не выконваюцца экалагічныя стандарты і патрабаванні.
Літва таксама нагадвае, што «Беларусь не выканала рэкамендацыі экспертаў Еўрапейскай групы рэгулятараў ядравай бяспекі (ENSREG), не вырашае ўзнятых Літвой пытанняў, якія датычаць сейсмічных аспектаў, размяшчэння ў Беларусі сховішчаў і пахаванняў радыеактыўных адкідаў і выкарыстанага ядравага паліва, магчымых экалагічных праблемаў, звязаных з выкарыстаннем водаў ракі Вяллі для ахаладжэння рэактараў Беларускай АЭС».
У сувязі з пералічаным Літва патрабуе прыпыніць эксплуатацыю БелАЭС, пакуль не будуць ліквідаваныя ўсе праблемы ядравай бяспекі, выяўленыя падчас міжнародных місіяў і экспертызаў.
Алена Аляксандрава belsat.eu