У разведвальнага ўпраўлення Міністэрства абароны ЗША (DIA) «няма падстаў сумнявацца» ў заяве прэзідэнта Расеі Уладзіміра Пуціна пра тое, што РФ перавезла ў Беларусь першую партыю тактычнай ядравай зброі. Пра гэта 21 ліпеня заявілі высокапастаўленыя прадстаўнікі амерыканскага ведамства, піша CNN.
Уладзімір Пуцін заявіў пра тое, што першыя расейскія ядравыя боегалоўкі былі дастаўленыя на тэрыторыю Беларусі ў чэрвені. І хоць афіцыйныя асобы ЗША і краінаў Захаду публічна не пацвердзілі, што якую-небудзь зброю перадалі Беларусі, высокапастаўленыя прадстаўнікі DIA паведамілі 21 ліпеня невялікай групе рэпарцёраў, што ў аналітыкаў «няма падстаў сумнявацца» ў заявах Пуціна, а таксама ў тым, «што яны дамагліся пэўных поспехаў» у перадачы зброі. Пры гэтым яны прызналі, што выведцы цяжка адсачыць гэтую зброю нават з дапамогай спадарожнікаў.
Іншыя крыніцы паведамілі CNN, што ў Беларусі ёсць розныя яшчэ савецкія аб’екты, на якіх можа быць размешчаная некаторая колькасць зброі.
Таксама і міністр абароны Вялікай Брытаніі Бэн Ўоліс сказаў CNN, што Лондан убачыў прыкметы таго, што перамяшчэнне ядравай зброі «прагрэсуе», і адзначыў, што Пуцін «не заўсёды хлусіць».
Пры гэтым, нягледзячы на заявы Аляксандра Лукашэнкі, высокапастаўленыя чыноўнікі DIA не вераць, што ён будзе мець які-небудзь кантроль над арсеналам. Зброя, хутчэй за ўсё, будзе цалкам кантралявацца Расеяй.
Чыноўнікі DIA таксама не вераць, што перамяшчэнне зброі ў Беларусь зменіць глабальны ядравы ландшафт або павысіць рызыку ядравага інцыдэнту, бо яна будзе знаходзіцца на захоўванні, а не на перадавым разгортванні, і будзе кантралявацца расейскімі сіламі.
Нагадаем, раней Аляксандр Лукашэнка неаднаразова заяўляў, што будзе кантраляваць тактычную ядравую зброю, якую Расея паставіць у Беларусь. І гэтак жа неаднаразова гэтыя слова абвяргалі расейскія афіцыйныя асобы.
Якуб Хруст belsat.eu