Тэрарыстычная арганізацыя «Ісламская дзяржава» апублікавала відэа, на якім нібыта знятыя двое расейскіх вайскоўцаў, захопленых у палон у баях за сірыйскі горад Дэйр-эз-Зор.
На відэа адзін з мужчын называе сваё імя – Раман Забалотны, 1979 года нараджэння. Ён таксама называе імя чалавека побач – гэта Рыгор Цуркану, 1978 года нараджэння.
Расейскае Міністэрства абароны ўжо заявіла, што людзі на відэазапісы не маюць дачынення да ўзброеных сіл Расеі.
Як высветліла Расейская служба Бі-бі-сі, Рыгор Цуркану ў лютым 2015 года ўступіў у арганізацыю «Баявое братэрства», прычым ужо тады яго прадстаўлялі як удзельніка баявых дзеянняў у Югаславіі ды Сірыі.
Кіраўнік Дамадзедаўскага аддзялення «Баявога братэрства» Аляксей Кірын на апублікаваным «ІД» відэа апазнаў Рыгора Цуркану, але сказаў у размове з Бі-бі-сі, што не ведаў пра тое, што яго знаёмы паехаў у Сірыю.
«Ісламская дзяржава» заявіла пра захоп у палон двух расейскіх салдат 28 верасня.
Па афіцыйных дадзеных Мінабароны Расеі, за час аперацыі ў Сірыі загінулі каля 40 расейскіх вайскоўцаў. СМІ таксама неаднаразова паведамлялі аб гібелі ў Сірыі расейскіх наймітаў, якія ваююць у шэрагах прыватнай ваеннай кампаніяй «Вагнэр».
ІІ, belsat.eu