Задзіночанне беларусаў свету «Бацькаўшчына» абвесціла збор подпісаў дзеля беатыфікацыі Францыска Скарыны.
Актывісты прапаноўваюць дасылаць лісты з подпісамі пробашчу менскага касцёла СвятыхСымона і Алены ксяндзу-каноніку Уладзіславу Завальнюку.
«Акрамя рэлігійнага значэння, наяўнасць сваіх святых аб’ядноўвае нацыю, дае адчуванне прыналежнасці да адной супольнасці. І наша гісторыя мае досыць фігур, якія ў свой час аказалі моцны ўплыў на духоўнае развіццё беларускага народа, годных і пасля сваёй смерці служыць яднанню беларусаў. Такой постаццю, да прыкладу, з’яўляецца Еўфрасіння Полацкая, святая для ўсіх безадносна прыналежнасці да пэўнай рэлігійнай канфесіі. А што адносна Францыска Скарыны? Хіба ён не варты таго, каб быць у ліку святых?» – пытаюцца арганізатары.
Ініцыятыўная група па кананізацыі Францыска Скарыны паўстала паводле ініцыятывы прафесара Адама Мальдзіса яшчэ ў 2015-м. Мальдзіс сцвярджае, што Скарына як святы мае належаць і праваслаўным, і каталікам, і ўніятам.
«Патрэбнае падтрыманне шырокага кола грамадскасці ў пацверджанні таго, што справа па беатыфікацыі Францыска Скарыны патрэбная не толькі рэлігійнай супольнасці, але і ўсяму беларускаму народу», – упэўненыя актывісты.
Летась нашая краіна адзначыла 500-годдзе выдання першай друкаванай Бібліі на беларускай мове, якое падрыхтаваў Францыск Скарына. Да сёння навукоўцы не ўпэўненыя што да канфесійнай прыналежнасці першадрукара. Існуе меркаванне, што ён мог быць пратэстантам.
ДД