Адмыслоўцы па геапалітыцы спрагназавалі будучыя падзеі «Гульні прастолаў»


Аналітычная кампанія «Geopolitical Futures» апублікавала 1 красавіка даклад «Геапалітыка Лёду і Агню» – агляд ваенна-палітычнай рэальнасці папулярнага цыклу Джорджа Марціна «Песня Лёду і Агню» і тэлесерыялу «Гульня прастолаў».

Аналітыкі апісалі геаграфічныя і эканамічныя характарыстыкі рэгіёнаў Вестэроса – кантынента, на якім адбываюцца галоўныя падзеі серыялу і кніг.

«На сённяшні момант Ланістэр сядзіць на Жалезным пасадзе, Ланістэры кантралююць заходнія землі, Рачныя землі і вялікую частку Штармавых земляў, а таксама сталіцу. Аднак іхны кантроль утрымліваецца сіламі, якія занадта тонка расцягнутыя і паўсюль сустракаюцца з выступленнямі супраць улады Кароны», – адзначаецца ў дакладзе.

«Дом Ланістэраў мае вялікія даўгі перад Жалезным банкам Браавоса. Мы ацэньваем долю доўга, які Карона не можа абслугоўваць, больш чым у 45 адсоткаў. Таксама Дом Ланістэраў страціў сваіх самых важных хаўруснікаў», – пішуць аналітыкі.

Аналіз на 10 старонках заканчваецца тым, што найбольш вялікай пагрозай для Ланістэраў зараз зʼяўляецца прынцэса Дэйнерыс Таргарыен з папярэдняй дынастыі, якая мае зброю масавага знішчэння – цмокаў, якія могуць дыхаць агнём.

Аднак, па меркаванні «Geopolitical Futures», Дэйнерыс не пачне вайну з атакі на сталіцу каралеўства, бо ўжыванне цмокаў у шчыльна заселеным горадзе прывядзе да масавых ахвяраў. Хутчэй яна пачне збіраць у адзін альянс усіх ворагаў Ланістэраў – і з вялікай верагоднасцю пачне з дапамогі Старкам на Поўначы, дзе кантыненту пагражаюць шматтысячныя арміі жывых мерцвякоў Караля Ночы.

«Geopolitical Futures» – прыватная аналітычная кампанія, якую ўзначальвае Джордж Фрыдман, заснавальнік фірмы «Stratfor», якая спецыялізуецца на геапалітычных прагнозах.

Сёмы сезон «Гульні прастолаў» тэлеканал НВО пачне паказваць 16 ліпеня.

Аляксандр Гелагаеў, belsat.eu

Глядзі таксама
Каментары