Ранкам 28 лістапада стала вядома пра хвалю пагромаў у дамах праціўнікаў рэжыму Аляксандра Лукашэнкі. Прыйшлі да сем’яў чальцоў Каардынацыйнай рады і Народнага антыкрызіснага ўпраўлення. Старшыня руху «За свабоду» Юрый Губарэвіч расказаў «Белсату», што вядома пра мэты пагромаў.
На момант публікацыі невядомы поўны маштаб. Праваабаронцам вядома пра пагромы ў старшыні Народнага антыкрызіснага ўпраўлення і намесніка кіраўніцы Аб’яднанага пераходнага кабінету Паўла Латушкі і некалькіх чальцоў каманды НАУ, у старшыні руху «За свабоду» Юрыя Губарэвіча, у эканаміста і сябра КР Сяргея Чалага, у дэлегата КР Міхаіла Таўбэ, у колішняга лідара «Маладога фронту» Артура Фінькевіча і прэс-сакратара Святланы Ціханоўскай Ганны Красулінай.
Паводле звестак Паўла Латушкі, сілавікі заходзяць у дамы ўзброеныя, апісваюць і арыштоўваюць маёмасць.
Юрый Губарэвіч расказвае «Белсату», што мае мала інфармацыі пра тое, што адбылося паводле адрасу ягонай прапіскі, бо ён не жыве там ужо больш за два гады і не мае там ніякай маёмасці. Але ведае, што цікавасць сілавікоў не толькі да яго, але і да чальцоў Каардынацыйнай рады, Народнага антыкрызіснага ўпраўлення і іншых дэмакратычных структураў.
«Хутчэй за ўсё, гэта канец года, нявыкананыя планы ў сілавікоў, – выказвае здагадку Губарэвіч. – Недастаткова людзей яны знаходзяць у Беларусі, каб затрымаць і пасадзіць. Планы не выконваюцца, людзі працягваюць супраціў. Не пахне тым, што сітуацыя пераменіцца, а грамадзяне Беларусі пачнуць падтрымліваць рэжым. Вось такая злосць ад бяссілля».
На думку Губарэвіча, «паходы па старых адрасах» нічога не дадуць сілавікам.
Паводле звестак «Вясны», ператрусы ладзяць паводле «справы выбараў у Каардынацыйную раду», у якой ёсць крымінальныя артыкулы за здраду дзяржаве, змову з мэтай захопу ўлады, заклікі да санкцыяў, стварэнне экстрэмісцкага фармавання і экстрэмісцкую дзейнасць.
Губарэвіч дапускае, што ў нейкай ступені хваля пагромаў можа быць звязаная з выбарамі ў КР, але звяртае ўвагу на тое, што ператрусы адбываюцца не толькі ў сябраў КР. За гэтымі дзеяннямі могуць быць розныя сігналы. Можа, Аляксандр Лукашэнка хацеў рэсэту стасункаў з Польшчаю пасля польскіх выбараў, а тая не імкнецца ў абдымкі, дык Лукашэнка ад нецярплівасці адрываецца на ўласных грамадзянах?
Дамініка Кунцэвіч, Алесь Наваборскі belsat.eu